როდესაც ქვეყანაში ომიკრონი დომინანტი შტამი გახდა, რომელიც ძალიან სწრაფად ვრცელდება, შეიძლება ითქვას, რომ კოვიდპასპორტი აღარ წარმოადგენდა მნიშვნელოვან პრევენციულ ღონისძიებას, - ამის შესახებ ინფექციონისტმა მაია კაშიამ „ქრონიკასთან“ განაცხადა.

მისი თქმით, კოვიდპასპორტების არსებობის დროს უნდა შეიცვალოს გარკვეული წესები და ადამიანს იმ შემთხვევაში უნდა მიენიჭოს მწვანე სტატუსი, თუ ის არის სრულად ვაქცინირებული ან ჩატარებული აქვს PCR ტესტი.

„ამ ეტაპზე, როდესაც ქვეყანაში ომიკრონი დომინანტი შტამი გახდა, ახალი შემთხვევების თითქმის 90% სწორედ ომიკრონისგან არის გამოწვეული, რომელიც ძალიან სწრაფად ვრცელდება, ვიდრე აქამდე არსებული შტამები, შეიძლება ითქვას, რომ კოვიდპასპორტი აღარ წარმოადგენდა მნიშვნელოვან პრევენციულ ღონისძიებას, თუმცა ეს არავითარ შემთხვევაში არ ნიშნავს იმას, რომ მისი გაუქმება მისასალმებელი და აუცილებელი იყოს, განსაკუთრებით იმის ფონზე, რომ კოვიდპასპორტებმა საკმაოდ კარგი, დადებითი დინამიკა მოახდინა იმუნიზაციის პროცესში ჩართულ პირთა რაოდენობის მატებაში. შესაბამისად, ამ ეტაპზე კოვიდპასპორტების გაუქმებამ შეიძლება საკმაოდ შეუშალოს ხელი იმუნიზაციის პროცესს და ეპიდემიოლოგიური მდგომარეობა ბევრად უფრო რთული გახდეს. მას შემდეგ, რაც კოვიდპასპორტები შემოვიღეთ ქვეყანაში, რა თქმა უნდა იყო გარკვეული კითხვები, თუნდაც ის, რომ მწვანე პასპორტი ენიჭებოდა ყველა იმ ადამიანს, ვისაც გადატანილი ჰქონდა გარკვეული დროის განმავლობაში კოვიდინფექცია, რაც თავიდანვე არ იყო სწორი, რადგან ვიცით, რომ ნებისმიერი ადამიანი შეიძლება ხელახლა დაინფიცირდეს გარკვეული პერიოდის შემდეგ, ხოლო ომიკრონმა ეს პერიოდები ბევრად შეამცირა და ამ შემთხვევაში შეიძლება რეინფიცირება 1 თვეშიც დადგეს, შესაბამისად, ამ ეტაპზე კოვიდ პასპორტების გაუქმება ნამდვილად არ არის მისასალმებელი, მაგრამ უნდა არსებობდეს გარკვეული წესები, რომელსაც უნდა დავემორჩილოთ. ამაში ვგულისხმობ მაგალითად, ადამიანს იმ შემთხვევაში უნდა მიენიჭოს მწვანე სტატუსი, თუ ის არის სრულად ვაქცინირებული ან ჩატარებული აქვს PCR ტესტი და ასე შემდეგ“, - აღნიშნა მაია კაშიამ.

imedinews.ge