მესტია ელექტროენერგიის მოხმარების თვალსაზრისით წლიდან წლამდე რეკორდებს ხსნის. რეგიონში, სადაც ფიზიკური პირები ელექტროენერგიის საფასურს არ იხდიან, კრიპტოვალუტების გამომუშავება ხშირია, ეს კი რეგიონს ელექტრო მომარაგების კუთხით პრობლემებს უკვე დიდი ხანია უქმნის.

მესტიაში მაინერების მუშაობის გამო, ელექტროენერგიის ჭარბ მოხმარებას რომ ტურიზმზე თავისი ეფექტი ექნებოდა, ამას ჯერ კიდევ ზამთარში საქართველოს ენერგეტიკის და წყალმომარაგების მარეგულირებელი ეროვნული კომისიის თავმჯდომარე დავით ნარმანიაც ამბობდა. ნარმანიას პოზიცია იყო, რომ სვანეთში გათიშულიყო უკანონო მაინერები, და თუ საჭიროება მოითხოვდა, ის უნდა დაყადაღებულიყო კიდეც.

დღეს სემეკის თავმჯდომარე ამბობს, რომ მიუხედავად მესტიის მაცხოვრებლების დაპირებისა და მაინერების გამოვლენის მიზნით ჩატარებული სპეცოპერაციებისა, ადგილზე ელექტროენერგიის მოხმარება მზარდი ტენდენციით მაინც ხასიათდება. მისივე თქმით, არსებული ქსელი მეტ დატვირთვას ფიზიკურად ვერ უძლებს, რის გამოც ახალი ობიექტების დაერთება ვეღარ ხორციელდება.

“სპეცოპერაციები კვლავაც უნდა გაგრძელდეს. სხვა გამოსავალი არ არის. სხვა შემთხვევაში იქ არსებული სიმძლავრეები მაქსიმალურად ათვისებული და დატვირთულია, ამიტომაც ახალი ობიექტების მიერთება შეჩერებულია. მარეგულირებელი კომისიის მიღებული გადაწყვეტილებით, გადავადებულია ახალი ობიექტების მიერთება, ვინაიდან არსებული ქსელი კიდევ დამატებითი სიმძლავრეებით დატვირთვას ვეღარ გაუძლებს. ამას ასაბუთებს ენერგო პრო, როცა ითხოვს ჩვენთან ახალი მიერთებების გადავადებას. ამდენად მესტიაში მდგომარეობა პრაქტიკულად უცვლელია," - აცხადებს სემეკის თავმჯდომარე.

თავის მხრივ, კომპანია ენერგო პროშიც ამბობენ, რომ სვანეთში ელექტროენერგიის მოხმარების შემცირების ტენდენცია არ შეიმჩნევა. უფრო მეტიც, მათი თქმით, ის ამ ეტაპზე მზარდია, რაც მათი განმარტებით, ნიშნავს იმას, რომ მაინერები კვლავ ჩართულია. როგორც ენერგო პროში აცხადებენ, კომპანია არსებული ქსელების შეკეთებას ახორციელებს, თუმცა ახალი ინვესტიციების განხორციელება მათთვის მომგებიანი არ არის.

მესტიაში კრიპტოვალუტების გამომუშავებისა და მაინერების მუშაობის პრობლემაზე საუბრობს  მესტიის მერი კახა ჟორჟოლიანიც მისი თქმით, იმის გამო რომ რეგიონში ელექტროენერგიის მოხმარება მზარდია, დენის ახალი დაერთებები ვეღარ ხორციელდება, შესაბამისად, ახალი სასტუმროებისთვის საკმარისი ელექტროენერგია აღარ არის. ჟორჟოლიანის აზრით, მოსაფიქრებელია ის, თუ რა შეიძლება მოსახლეობისთვის იყოს შეთავაზებული, რომ რეგიონი ამ ჩიხიდან გამოვიდეს და განვითარება განაგრძოს.

“მე ვერ გეტყვით, რომ ეს პრობლემა ბოლომდე მოგვარებული და გადაჭრილი გვაქვს, მაგრამ იმას, რომ ამაზე უკეთესი არის ტურიზმის განვითარება და იქ უფრო მეტი შემოსავალია, ამას უკვე ხვდება მოსახლეობა და არ უნდა რომ ერთმანეთის ხელის შეშლით ხდებოდეს რამე. აქაც ძირეულად სწორად გვაქვს პრობლემა გადასაჭრელი და დასაფიქრებელია თუ რას შევთავაზებთ მოსახლეობას და როგორ შეიძლება ამ ჩიხიდან გამოვიდეთ. იმიტომ რომ ჩვენ უკვე მომავლის განვითარებაში პრობლემა შეგვექმნა. მაგალითად დენის ახალი დაერთებები არ ხდება, სასტუმრო არ შენდება, რადგან უკვე ვეღარ აერთებენ ქსელზე. იმდენად ჭარბი მოხმარებაა, რომ ვეღარ უძლებს ჩვენი ელექტროქსელები მოხმარებას და გაჩერებული ვართ. ჩვენ თუ გვინდა რომ გავჩერდეთ და არ განვითარდეთ, მაშინ კი ბატონო, ასე იყოს,”-აცხადებს მესტიის მერი კახა ჟორჟოლიანი.

ცნობისთვის, მესტიაში ელექტროენერგიის ჭარბ მოხმარებზე საუბარი დიდი ხანია მიმდიანარეობს, მათ შორის  საკითხი ყველაზე მწვავედ ზამთარში იდგა, როცა ჭარბი მოხმარების გამო ადგილზე ელექტროენერგიის ავარიული გათიშვები დაიწყო. მიზეზი მესტიაში კრიპტოვალუტების გამომუშავება იყო, რომლის ფაქტების გამოვლენის მიზნით ადგილზე სპეცოპერაციების ჩატარდა. ამასთან საქმიანობის შეწყვეტის მიზნით, ადგილობრივებმა წმინდა გიორგის ხატზეც დაიფიცეს.

წყარო: bm.ge