მაკდონალდსმა გამოაცხადა, რომ უკრაინაში სამხედრო ოპერაციის გამო დროებით დახურავს რუსეთში 850 სწრაფი კვების რესტორანს.
ამასთან, ხელფასების მიღებას ქსელის 62 ათასი თანამშრომელი გააგრძელებს. ამის შესახებ კომპანიის პრესსამსახურმა კომპანიის აღმასრულებელი დირექტორის კრის კემპჩინსკის ოფიციალური განცხადება გამოაქვეყნა.
„ჩვენ გვესმის, რა გავლენას მოახდენს ეს გადაწყვეტილება ჩვენს რუს თანამშრომლებსა და პარტნიორებზე, ამიტომ ჩვენ მზად ვართ მხარი დავუჭიროთ მათ, ისევე როგორც ჩვენს უკრაინელ კოლეგებს. კერძოდ, ჩვენ გავაგრძელებთ ხელფასების გადახდას მაკდონალდსის ყველა თანამშრომლისთვის რუსეთში“, - ნათქვამია კომპანიის განცხადებაში.
გავრცელებული ინფორმაციით, კომპანია ასევე მუშაობს ,,ასობით ადგილობრივ მომწოდებლებთან და პარტნიორებთან", რომლებიც აწარმოებენ პროდუქტებს ქსელისთვის.
კომპაბნიაში აცხადებენ, რომ არ იციან, როდის შეძლებენ რუსული რესტორნების გახსნას.
„ჩვენ განვიცადეთ შეფერხებები ჩვენს მიწოდების ჯაჭვში, ისევე როგორც სხვა საოპერაციო ზემოქმედება. ჩვენ ასევე ყურადღებით დავაკვირდებით ჰუმანიტარულ მდგომარეობას“, - ნათქვამია კომპანიის განცხადებაში.
წინა დღით ეს განცხადება მაკდონალდსის თანამშრომლებსა და ფრენჩაიზის მფლობელებს გაუგზავნეს.
მანამდე სოციალური ქსელების მომხმარებლებმა ,,მაკდონალდსის" ბოიკოტისკენ მოუწოდეს იმის გამო, რომ კომპანიამ უკრაინაში სამხედრო ოპერაციის საპასუხოდ რუსული ბაზარი არ დატოვა.
მსხვილი უცხოური ბიზნესი რუსეთში მუშაობას აჩერებს უკრაინაში რუსული არმიის სამხედრო ოპერაციისა და ქვეყნის წინააღმდეგ ეკონომიკური სანქციების გამო.