„მაკროეკონომიკური თვალსაზრისით, ერთადერთ პრობლემას მაღალი ინფლაცია და ლარის მეტისმეტად გამყარება წარმოადგენს“ - ამის შესახებ „კომერსანტთან“ ფინანსისტმა და პრეზიდენტის ყოფილმა მრჩეველმა თემურ ბასილიამ, 2022 წლის შეჯამებისას განაცხადა.
მისი თქმით, 2022 წელი საქართველოს ეკონომიკისთვის საკმაოდ წარმატებული იყო.
„პირველი რიგში აღსანიშნავია ქვეყნის ეკონომიკური ზრდა. კერძოდ, მიმდინარე წლის პირველი ათი თვის მონაცემებით ეკონომიკურმა ზრდამ 10.0% შეადგინა. აღსანიშნავია ექსპორტის საკმაოდ შთამბეჭდავი, 34%-იანი ზრდა. ასევე, გასულ წლებთან შედარებით საგრძნობლად გაზრდილია შემოსავლები ტურიზმიდან. ქვეყანაში არსებული ეკონომიკური სტაბილურობა საქართველოს მიმზიდველ ქვეყანად ხდის ინვესტორებისთვის, რის შედეგადაც გაზრდილია უცხოური ვალუტის შემოდინება. მაკროეკონომიკური თვალსაზრისით, ერთადერთ პრობლემას მაღალი ინფლაცია და ლარის მეტისმეტად გამყარება წარმოადგენს, რამაც საშუალოვადიან პერსპექტივაში შეიძლება შეაფერხოს ექსპორტის შემდგომი ზრდა“,— აღნიშნა ბასილიამ.
ფინანსისტმა 2022 წლის მნიშვნელოვანი პროექტებზეც ისაუბრა და მათ შორის სამხრეთ კავკასიის გაზსადენის პროექტი და შავ ზღვაში ელექტროენერგიის გამტარი კაბელის პროექტი გამოყო.
„რაც შეეხება მნიშვნელოვან ეკონომიკურ მოვლენებს, პირველ რიგში გამოვყოფდი სამხრეთ კავკასიის გაზსადენის პროექტს, რომელიც საშუალებას მისცემს ევროკავშირის ქვეყნებს საქართველოს გავლით აზერბაიჯანული გაზის გაორმაგებული რაოდენობა მიიღონ. ამ პროექტით საქართველოსთვის ახალი შესაძლებლობების ფანჯარა იხსნება, რაც ქვეყანამ მაქსიმალურად უნდა გამოიყენოს.
ასევე, ძალიან მნიშვნელოვანია შავ ზღვაში ელექტროენერგიის გამტარი კაბელის პროექტი, რომლის მეშვეობით აზერბაიჯანული მწვანე ენერგია საქართველოს გავლით მიეწოდება ევროგაერთიანების ქვეყნებს. 2020 წლის ივნისში მსოფლიო ბანკმა შეისწავლა და დაადასტურა საქართველოსა და რუმინეთს შორის შავი ზღვის წყალქვეშა კაბელის ეკონომიკური მიზანშეწონილობა. ეს იქნება 1000 მეგავატი სიმძლავრის რეკორდულად გრძელი, 1100 კილომეტრიანი კაბელი. საქართველოს, აზერბაიჯანის, რუმინეთის და უნგრეთის ლიდერებმა შეთანხმებას „მწვანე ენერგიის განვითარების და გადაცემის სფეროში სტრატეგიული პარტნიორობის შესახებ“ ხელი 17 დეკემბერს მოაწერეს.
ძალიან მნიშვნელოვანი იყო საქართველოსთვის ევროკავშირის წევრობის პერსპექტივის მიღება. ეს უდიდესი, წინ გადადგმული ნაბიჯია, რადგან მანამდე საქართველოს არავინ განიხილავდა ევროკავშირის პოტენციურ წევრად. ამავე დროს, აღსანიშნავია, რომ მოლოდინი და სურვილი იმისა, რომ საქართველოსაც ჰქონოდა იგივე სტატუსი, რაც მოლდოვამ და უკრაინამ მიიღეს, ობიექტური გახლდათ. ბოლოს და ბოლოს, საქართველო ნამდვილად არცერთი მაჩვენებლით არ არის მოლდოვასა და არც უკრაინაზე უკან. უფრო მეტიც, ბევრ სფეროში ,თუნდაც, კორუფციის მაჩვენებლით, ან მმართველობის სისტემით, ბევრად უსწრებს მათ“, — აღნიშნა თემურ ბასილიამ.