ძალიან სკრუპულოზური კვლევები ჩატარდა იმასთან დაკავშირებით, რა რესურსის მატარებელია თბილისი, - ამის შესახებ ტელეკომპანია „იმედის“ გადაცემაში „იმედის ფაქტორი“ თბილისის მიწათსარგებლობის გენერალური გეგმის ავტორმა და ურბანისტმა, მამუკა სალუქვაძემ განაცხადა.
„თუ დახედავთ საკადასტრო რუკას, დაინახავთ, როგორ არის დაქსელილი ქალაქი კერძო საკუთრებებით. პრაქტიკულად თავისუფალი ადგილი არაა დარჩენილი. ჩვენ დავიწყეთ ისეთი ტერიტორიების ძიება, რომელთა განვითარებაც გამწვანებისა და რეკრეაციის სახით შეიძლებოდა. ასეთი ტერიტორიები ქალაქის განაშენიანებულ ნაწილში ძალიან ცოტაა. ერთ-ერთი მოტივაციაც ის იყო, რომ განაშენიანების გარეთ მაქსიმალურად დაგვეცვა ტერიტორია, რადგან ესაა ქალაქის ფილტვები. წინა გენგეგმაზე სატყეო ტერიტორია და ლანდშაფტის დაცვის ზონა საერთოდ არ იყო დატანილი, რაც ნებართვების გაცემის საშუალებას იძლეოდა. როგორც კი აღვადგინეთ სატყეო ზონა, ქალაქის მერიამ უნდა მოილაპარაკოს ყველა კერძო მესაკუთრესთან. ახალი პარკების ცნება სწორედ ახალმა გენგეგმამ შემოიტანა. როდესაც ტერიტორია სახელმწიფოს ეკუთვნის, მისი განვითარება გაცილებით მარტივია, იმიტომ რომ კერძოს უნდა მოელაპარაკო და დაითანხმო გამოსყიდვაზე, როგორც ეს დიღმის ტყე-პარკში მოხდა და ამას სჭირდება ფული“, - განაცხადა მამუკა სალუქვაძემ.
imedinews.ge