საქართველოში მოქმედმა ორმა უმსხვილესმა კომერციულმა ბანკმა 2021 წელს მენეჯმენტზე ჯამურად დაახლოებით 75  მლნ ლარი დახარჯა.

2021 წლის ანგარიშის მიხედვით, საქართველოს ბანკმა დირექტორატს 42,278,859 ლარი, სამეთვალყურეო საბჭოს 2,890,607 ლარი, ხოლო სხვა მატერიალური რისკების ამღებ პირებს 4,276,978 ლარი გადაუხადა. რაც სხვა ბანკებთან შედარებით, მენჯმენტზე დახარჯული ყველაზე მაღალი მაჩვენებელია.

გარდა ამისა, საქართველოს ბანკის  2021 ფინანსური წლის განმავლობაში გადახდილი გადავადებული ანაზღაურების მთლიანი მოცულობა დირექტორატის შემთხვევაში 13,442,067 ლარს, ხოლო სხვა მატერიალური რისკების ამღებ პირებისთვის 1,988,773 ლარს შეადგენდა.

ბანკის უმაღლესი მენეჯმენტი, რომელიც 14 ძირითადი პირისგან შედგება (ნილ ჯანინი, ალასდაირ ბრიჩი, თამაზ გიორგაძე, ჰანნა ლოიკაინენი, ჯონათან მუირი, სესილ დაერ ქუილენ, ვერონიკ მაკქეროლ, მარიამ მეღვინეთუხუცესი, არჩილ გაჩეჩილაძე, სულხან გვალია, გიორგი ჭილაძე, ლევან ყულიჯანიშვილი, მიხეილ გომართელი, ეთერ ირემაძე, ზურაბ ქოქოსაძე, ვახტანგ ბობოხიძე, სხვა მატერიალური რისკის ამღები პირები) 1,669,212 აქციას ფლობენ. აქედან ყველაზე მეტი 442,234 აქცია გენერალური დირექტორის არჩილ გაჩეჩილაძის მფლობელობაშია, რომელთა ღირებულება 6.5 მლნ სტერლინგამდეა. მეორე ადგილზე გიორგი ჭილაძე 335,272 აქციით, ხოლო მესამეზე მიხეილ გომართელი 305,141 აქციით.

მართალია საქართველოს ბანკმა მენეჯმენტზე ყველაზე მეტი თანხა დახარჯა, თუმცა ყველაზე მდიდარი ბანკირის სტატუსს კვლავ თიბისი ბანკის წარმომადგენელი იკავებს, მამუკა ხაზარაძის შემდეგ ეს სტატუსი, 2021 წლის ანგარიშების მიხედვითაც, ვახტან ბუცხრიკიძეს ერგო.

2021 წლის მონაცემებით, თიბისი ბანკმა დირექტორატს 25,717,987 ლარი, სამეთვალყურეო საბჭოს 1,808,960 ლარი, ხოლო სხვა მატერიალური რისკების ამღებ პირებს 764,486 ლარი გადაუხადა.

გარდა ამისა, თიბისი ბანკის 2021 ფინანსური წლის განმავლობაში გადახდილი გადავადებული ანაზღაურების მთლიანი მოცულობა დირექტორატის შემთხვევაში 12,220,215 ლარს, ხოლო სხვა მატერიალური რისკების ამღებ პირებისთვის 286,307 ლარს უდრის.

ბანკის უმაღლესი მენეჯმენტი, რომელიც 6 ძირითადი პირისგან შედგება (ნინო მასურაშვილი, გიორგი თხელიძე, ნიკოლოზ ქურდიანი, ვახტანგ ბუცხრიკიძე, თორნიკე გოგიჩაიშვილი, გიორგი მეგრელიშვილი, სხვა მატერიალური რისკის ამღები პირები) 1,585,428 აქციას ფლობს. აქედან ყველაზე მეტი 1,026,263 აქცია ვახტანგ ბუცხრიკიძის მფლობელობაშია, რომელთა ღირებულება 15 მლნ სტერლინგს აღწევს. მეორე ადგილზეა ნინო მასურაშვილი 302,752 აქციით, მესამეზე კი გიორგი თხელიძე 127,317 აქციით.

ნინო თამაზაშვილი