საქართველოს ტურისტული პოტენციალის შესახებ  ბოლო წლების განმავლობაში განსხვავებული მოსაზრებებია. არსებული ინფრასტრუქტურით რეალურად რამდენი ტურისტის მასპინძლობას შეძლებს ქვეყანა, ამაზე საერთაშორისო და ადგილობრივ სპეციალისტებს ერთმანეთისგან განსხვავებული პოზიცია აქვთ.

ჯერ კიდევ 2020 წელს, როცა ტურიზმის მსოფლიო ორგანიზაციის ღონისძიება ჩატარდა, გამოითქვა მოსაზრება, რომ 2023 წელს, თუკი პანდემია დასრულებული იქნება, საქართველო 16 მილიონი ტურისტის მიღებას შეძლებს. ტურიზმის სფეროს სპეციალისტი ნიკა კვარაცხელია ამ მოსაზრებას არ ეთანხმება და აცხადებს, რომ 8 მილიონი ტურისტი ის მაქსიმალური რაოდენობაა, რომლის მიღებას ქართული ტურისტული ინდუსტრია მეტნაკლებად გაუმკლავდება.

,,ვფიქრობ, შეუძლებელია, საქართველომ 16 მილიონი სტუმარი მიიღოს. ზოგადად დამსვენებლების რაოდენობა გაიზარდა საბჭოთა კავშირის დროინდელ ტურიზმთან შედარებით, მაგრამ ამ რაოდენობის ტურისტს ქვეყანა რეალურად ვერ გაუმკლავდება.  ინფრასტრუქტურა და საწოლების რაოდენობა გაცილებით ნაკლებია. 1988 წელს გვქონდა 920 000 საწოლი ადგილი, ახლა  2-ჯერ ნაკლებია, მაქსიმუმ, 400 000 იყოს. სასტუმროების რაოდენობა 1700-მდეა, მაგრამ მათი უმეტესობა მცირე ზომისაა. დიდი სანატორიუმებით, ტურბაზებით და სასტუმროებით  1988 წელს ძლივს მოგროვდა 5 მილიონი ტურისტი, მოსახლეობა სულ 4 მილიონი იყო. 16 მილიონი იმის ნახევარია, რასაც მსოფლიოს ერთ–ერთი უდიდესი ქვეყანა თურქეთი იღებს. 30 მილიონზე ზევით პირველ ათეულში ხვდებიან ტურისტების მიმღები ქვეყნები. საქართველოს ტიპის ქვეყნისთვის ამდენი ტურისტის მასპინძლობა რეალურად წარმოუდგენელია, არც ერთი კომპონენტით ამისთვის ქვეყანა მზად არ არის“, - აცხადებს ,,კომერსანტთან“ ნიკა კვარაცხელია.

მისი თქმით, საქართველოსთვის მნიშვნელოვანი უნდა იყოს არა ტურისტების რაოდენობა, არამედ მაღალმხარჯველი კონტინგენტი, რასაც დიდი მოგების მოტანა შეუძლია ქვეყნისთვის.

,,არ უნდა გამოვეკიდოთ რაოდენობას, საქმე ფულია. ბევრი ტურისტი კარგია, მაგრამ მთავარია დანახარჯი, რა ფულს დახარჯავენ ტურისტები  საქართველოში. რაც შეეხება მიმდინარე სეზონს, ხელისშემშლელი რაიმე განსაკუთრებული მიზეზი არ გვაქვს. ზოგადად, რა თქმა უნდა, ომი ხელის შემშლელია, მაგრამ ამჯერად ტურიზმზე დიდ გავლენას ვერ მოახდენს. საქართველოში რუსეთის, უკრაინის და ბელარუსის ბევრი მოქალაქეა და ეს ძალიან დიდი შევსებაა. ომმა კავკასიური ტურები შეამცირა, მაგრამ გაიზრდება ტურები ისეთი ქვეყნებიდან, როგორიც არის - ბალარუსი, ყაზახეთი, შუა აზიის ქვეყნები და ისინი აანაზღაურებენ დანაკლისს“, - აცხადებს ნიკა კვარაცხელია.

ტურიზმი, რომელიც ბოლო სამი წელია ძალების აღდგენას ცდილობს, ზაფხულის სეზონის დაწყებისთვის უკვე მზადაა. სასტუმროები პირველი ვიზიტორის მოლოდინში არიან. გაძვირებული ცხოვრება ბიზნესსაც შეეხო, ამიტომ მომსახურების ტარიფებიც გაიზარდა. მიუხედავად ამისა, კურორტებზე იმედოვნებენ, რომ დამსვენებლები ეყოლებათ.

რაც შეეხება საქართველოში საწოლფონდებს, ტურიზმის ეროვნული ადმინისტრაციის ინფორმაციით, 115 469 -ს შეადგენს. აქედან ყველაზე მეტი, 29 398 აჭარის რეგიონშია. თბილისის შემთხვევაში ეს მაჩვენებელი 26 743-ს შეადგენს.

მარი ჩიტაია