მეფრინველეობის განვითარების ასოციაციის თავმჯდომარემ და კომპანია „კუმისის“ ხელმძღვანელმა ზურაბ უჩუმბეგაშვილმა რადიო „კომერსანტის“ ეთერში მეფრინველეობის სექტორში 2022 წლის გამოწვევებზე ისაუბრა და განაცხადა, რომ უკრაინაში ომის დაწყების შემდეგ, მეფრინველეობისთვის საჭირო მარცვლეულის ერთადერთი მომწოდებელი რუსეთი გახდა. 

უჩუმბეგაშვილის თქმით, ამ ფონზე არც ახალი ბაზრის ძიება გამოდის, რადგან რეგიონში ხორბლის და მარცვლეულის მწარმოებელი არც ერთი ქვეყანა არაა.

„წლის დასაწყისი ძალიან პანიკური იყო - ბაზრიდან მარცვლეულის და ზეთეული კულტურების მომწოდებელი სახელმწიფო, უკრაინა ჩაიხსნა და მხოლოდ რუსეთის მარცვლეულის იმედად დავრჩით. გაორმაგდა მატარებელზე ფასი, გაგვიჭირდა საწვავი და დისტრიბუცია. საკმაოდ შემაშფოთებელ სიტუაციაში ვიყავით, მაგრამ ფასის მინიმალური მატებით, წარმოების მოცულობა შევინარჩუნეთ, არც კვერცხის და არც ქათმის დეფიციტი არ შექმნილა,“ - განაცხადა ზურაბ უჩუმბეგაშვილმა.

მისი თქმით, ალტერნატიული ბაზრის ძიება არ გამოვა, რადგან რეგიონში არც ერთი ქვეყანა არ არის ხორბლის და მარცვლეულის მწარმოებელი, ევროპაში მაღალი ფასებია, უფრო დიდი ბაზრებისთვის კი - მარცვლეულის პორტი არ გვაქვს.

„ახალი ბაზრის მოძიება არანაირად არ გამოვა. ჩვენს რეგიონში მყოფი არც ერთი ქვეყანა არ არის ხორბლის და მარცვლეულის მწარმოებელი. ერთადერთი ვარიანტი ყაზახეთია, მაგრამ ყაზახეთიდან ტრანსპორტირება და ლოჯისტიკა იმდენად რთული და ძვირია, საფურაჟე ხორბლის წამოღება ფაქტობრივად აზრს კარგავს და ყაზახეთს სიმინდიც არ აქვს.

ევროპაში იცით რა ფასებია და მარცვლეულის კუთხით იქ უარესი მდგომარეობაა. დიდი მწარმოებელი ქვეყნებიდან, მაგალითად - ამერიკა და ავსტრალია - რაიმე მარცვლეულის შემოტანაზე საუბარი ზედმეტია, რადგან მარცვლეულის პორტი არ გვაქვს. 3 და 4 000-ტონიანი გემის შემოყვანა იმდენად ძვირი ჯდება, რომ აზრს კარგავს.

ფაქტებიდან გამომდინარე, მარცვლეულის შემომტანი ერთადერთი რუსეთია და ღმერთმა ქნას უკრაინაში ომი დამთავრდეს, რომ მარცვლეულის ბაზარზე უკრაინაც დაბრუნდეს“, - განაცხადა ზურაბ უჩუმბეგაშვილმა.