უკრაინამ პროექტი, „მარიუპოლის აღორძინება“ (Mariupol:Reborn) ჩაუშვა, რომლის მიზანიც ქალაქის აღდგენის გეგმის შექმნაა. პროექტის რეალიზებას, USAID-ის მხარდაჭერით, საერთაშორისო ფინანსური ორგანიზაციები, კერძოდ, მსოფლიო ბანკი და EBRD, ასევე, მსხვილი ბიზნესკომპანიები, რინატ ახმეტოვის ჰოლდინგი, SCM (System Capital Management) და Metinvest შეუერთდებიან. პროექტისადმი ინტერესი ევროპის რამდენიმე ქალაქის მერმაც დაადასტურა. Metinvest-ის პრესსამსახურის განცხადებას პორტალი „გორდონი“ ავრცელებს.
მოელიან, რომ „მარიუპოლის აღორძინება“ ევროპაში მეორე მსოფლიო ომის შემდეგ ყველაზე მასშტაბური პროექტი იქნება. ის ხუთი ეტაპისგან შედგება. პირველ ეტაპზე ურბანისტები და არქიტექტორები, უკრაინელ კოლეგებთან და ქალაქის მცხოვრებლებთან ერთად, მარიუპოლის ვიზუალური გეგმის რამდენიმე ვარიანტს შეიმუშავებენ.
პროექტის შემდეგი ეტაპები ზარალის შეფასებასა და კრიტიკული ინფრასტრუქტურის სწრაფი აღდგენის სტრატეგიას მოიცავს. პირველი სამი ეტაპის შედეგებზე დაყრდნობით ჩამოყალიბდება აღორძინების გეგმა, რომლის განხორციელებაც მარიუპოლის მცხოვრებლების მაქსიმალური ჩართულობით დაიწყება.
მოსახლეობასთან ქალაქის აღდგენის წინადადებები მიგრანტთა მხარდაჭერის ცენტრ „მე - მარიუპოლის“ მეშვეობით განიხილება.
რაც შეეხება მეტალურგიულ ქარნებს, Metinvest Group-ის გენერალური დირექტორი, იური რიჟენკოვი აცხადებს, რომ ახალ ქალაქში წარმოება, დეკარბონიზაციის ფარგლებში, ეკოლოგიურად სუფთა, ენერგოდამზოგავი და ეკონომიკურად გამართული იქნება. მისი თქმით, განვითარების ეს ვექტორი კომპანია Metinvest-ს ჯერ კიდევ ომამდე ჰქონდა შემუშავებული.
„მარიუპოლის მეტალურგიული საწარმოები უკრაინის მძლავრ მაღალტექნოლოგიურ ინდუსტრიულ კერად უნდა იქცეს,“ - ამბობს რიჟენკოვი.
მერის, ვადიმ ბოიჩენკოს განცხადებით, მალე გათავისუფლებული ქალაქებისა და სოფლების სიას მარიუპოლიც დაემატება, რომელსაც უკრაინელი გმირები 86 დღის განმავლობაში იცავდნენ, ხოლო გათავისუფლების შემდეგ მაშინვე ქალაქის აღორძინება დაიწყება და „მარიუპოლი ევროპაში მშვიდობის დაბრუნების სიმბოლო“ გახდება.