მარიუპოლში საკვებისა და წყლის ბოლო მარაგი იწურება. ამის შესახებ მარიუპოლის საკრებულოს Telegram-ში გავრცელებულ განცხადებაშია ნათქვამი.
განცხადებას უკრაინული გამოცემა უნიანი ავრცელებს.
განცხადებაში აღნიშნულია, რომ მარიუპოლში ვითარება კვლავაც ძალიან მძიმეა - „ქალაქში არ არის ელექტროენერგია, წყალი, გათბობა, თითქმის არ არის მობილური კავშირი, იწურება საკვების და წყლის ბოლო მარაგი“.
სიტუაციას ართულებს რუსი ოკუპანტების მუდმივი დაბომბვა.
"მტერი შეგნებულად ესვრის საცხოვრებელ უბნებს. დღეს რუსებმა განაგრძეს ქალაქის დაბომბვა თვითმფრინავებიდან. დაბომბეს საცხოვრებელი სექტორი ნახიმოვის გამზირისა და იტალიასკაიას ქუჩის კვეთაზე, ასევე იყო დარტყმები კინოთეატრ სავონასთან. არის ინფორმაცია მარიუპოლის სახელმწიფო უნივერსიტეტის შენობის დაბომბვის შესახებაც“, - აცხადებენ საკრებულოში და იქვე განმარტავენ, რომ მარიუპოლის დამცველები აგრძელებენ მტრის გმირულად შეკავებას.
ქალაქის საკრებულოს დადასტურებული ინფორმაციით, უკრაინის საპორტო ქალაქ მარიუპოლში 2187 ადამიანი დაიღუპა მას შემდეგ, რაც რუსეთი უკრაინაში შეიჭრა.
ქალაქი ამ დრომდე რუსული ძალების მიერ ალყაშია გარშემორტყმული. ბოლო 24 საათის განმავლობაში, სულ მცირე 22 დაბომბვა მოხდა ქალაქში. მარიუპოლში უკვე 100-ზე მეტი ბომბია ჩამოგდებული.
ქალაქში ამჟამად 400,000 ადამიანია ჩარჩენილი.
უკრაინული მხარის ინფორმაციით, უკრაინის ვიცე პრემიერი, ირინა ვერეშჩუკი ამბობს, რომ რუსმა ოკუპანტებმა 14 ჰუმანიტარული დერეფნიდან 5 მარშრუტზე ავტობუსები და ჰუმანიტარული დახმარებით დატვირთული მანქანები არ გაატარეს.
უკრაინის ქალაქ მარიუპოლში ჰუმანიტარული მდგომარეობა დღითიდღე უარესდება. სატელიტური ტექნოლოგიების ამერიკული კომპანიის, Maxar-ის უახლესი სატელიტური სურათებიც გავრცელდა, რომელიც მარიუპოლში, რუსული თავდასხმების შედეგად მიყენებულ კოლოსალური ზარალს აჩვენებს.
მარიუპოლიდან მშვიდობიანი მოსახლეობის ევაკუაციის რამდენიმე (სამი) მცდელობა ამ კვირის დასაწყისში მას შემდეგ ჩაიშალა, რაც რუსულმა მხარემ საბრძოლო მოქმედებების დროებითი შეწყვეტის შესახებ შეთანხმება დაარღვია. მოსახლეობას 10 დღეა იქ არ მიეწოდება ელექტროენერგია, წყალი, გაზი და გათბობის გარეშეა დარჩენილი. უკრაინული მხარე აცხადებს რომ ქალაქი ჰუმანიტარული კატასტროფის ზღვაზეა. არიან დაჭრილები და გარდაცვლილებიც, რომელთა ევაკუაცია ამ დრომდე ვერ მოხერხდა, რადგან რუს ოკუპანტებს ჰუმანიტარულიო დერეფანი ბლოკირებული აქვთ.
შეგახსენებთ, რუსეთი უკრაინაში 24 თებერვალს, გამთენიისას შეიჭრა და მას შემდეგ განუწყვეტლივ ბომბავს როგორც სამხედრო ობიექტებს, ისე მშვიდობიან მოსახლეობას. მოსკოვი საჯარო განცხადებებში უარყოფს სამოქალაქო ობიექტების მიზანში ამოღებას. გაეროს მონაცემებით, უკრაინა უკვე დატოვა 2.5 მილიონმა ადამიანმა.
უკრაინა რუსეთის ტერორისტ ქვეყნად გამოცხადებას ითხოვს და ჰააგის სასამართლოში ჩივის. სასამართლო პროცესი გასულ კვირას დაიწყო, თუმცა პროცესზე არ გამოცხადდა რუსეთის წარმოემადგენელი. როგორც ქვეყნის საგარეო საქმეთა სამინისტროს წარმომადგენელი მარია ზახაროვა ამბობს, სასამართლოს ამ საკითხზე მსჯელობის ლეგიტიმაცია არ აქვს.
როგორც უკრაინის სახალხო დამცველი აცხდებს, სრული სიზუსტით გროვდება რუსეთის მიერ უკრაინაში ჩადენილი სამხედრო დანაშაულის ყველა ფაქტი და უკრაინა მას სამხედრო ტრიბუნალამდე მიიტანს.
რუსეთს უკრაინაში შეჭრის და იქ საომარი მოქმდებების გამო სანქციები დაუწესა ლამის მთელმა მსოფლუიომ, უიშვიათესი გამონაკლისის გარდა.