სპეციალისტები საარსებო მინიმუმთან დაკავშირებით ცვლილების საჭიროებაზე საუბრობენ. ყველაზე მეტი შენიშვნა სურსათის კომპონენტთან დაკავშირებითაა, რომელსაც სასურსათო კალათაში 70% უჭირავს, როცა განვითარებული ქვეყნების შემთხვევაში ეს მაჩვენებელი 15-30%-ის ფარგლებშია. აკადემიკოს პაატა კოღუაშვილის განცხადებით, პურის წილი სასურსათო კალათაში 60%-ს აჭარბებს, რაც საბოლოოდ მოსახლეობის ჯანმრთელობაზე აისახება ცუდად, განსაკუთრებით კი ბავშვებსა და მეძუძურ დედებზე, რომელთა დიდი ნაწილი ფაქტობრივად შიმშილის ზღვარზეა.
,,პური ძირითადი საკვები პროდუქტია, რომელსაც საქართველოს მოსახლეობა ყველაზე მეტი რაოდენობით მოიხმარს. შეიძლება ითქვას, რომ საგანგაშო დონემდეც, მისი წილი სასურსათო კალათაში 60%-ს აჭარბებს, როცა ყველა ნორმალურ ქვეყანაში ეს მაჩვენებელი 10-12%-ის ფარგლებშია. ასეთი სხვაობის მიზეზი მოსახლეობის მძიმე სოციალურ მდგომარეობაა. შესაბამისად, სანამ ქვეყანა სასურსათო უსაფრთხოებაში წარმატებას არ მიაღწევს და მოსახლეობის კეთილდღეობა არ გაუმჯობესდება, ჯანსაღი კვების პრობლემა შეიძლება წლობით მოუგვარებელი დარჩეს. კორონავირუსის პანდემიამ მდგომარეობა უფრო გააუარესა. ჩვენი მოქალაქეების უდიდესი ნაწილი ვალებით იკვებება, იქნება ეს ბანკის ვალი თუ ნაცნობ-ახლობლებისგან ნასესხები ფული, ხალხი ძალიან მძიმე მდგომარეობაშია. პრობლემაა იმ მხრივაც, რომ სიძვირის გამო ხარისხიან პროდუქციაზე მოთხოვნა შემცირდა“, - აცხადებს კოღუაშვილი ,,კომერსანტთან“ საუბარში.
როგორც აკადემიკოსი განმარტავს, პურზე მოთხოვნა განპირობებულია ტრადიციულადაც, ვინაიდან იგი ყოველთვის მთავარ საკვებად მიიჩნეოდა საქართველოში, თუმცა ყველაზე დიდი რაოდენობით მაინც ღარიბი მოსახლეობა მოიხმარს.
,,კვებასთან დაკავშირებით გაცილებით მძიმე მდგომარეობაში არიან ბავშვები, რადგან სხვადასხვა პერიოდში ჩატარებული კვლევებით დასტურდება, რომ ჩვენი პატარები არაჯანსაღად იკვებებიან და მათ რაციონში არ არის ზრდისა და განვითარებისათვის აუცილებელი პროდუქტები. თითქმის არ იღებენ რძის პროდუქტებს, რითაც კალციუმის მარაგი უნდა შეივსონ და რამაც მათი ძვლების განვითარება უნდა მოახდინოს. ვისაც მეტნაკლებად შეუძლია კვების ხარჯი გასწიოს, ზოგიერთ ასეთ ოჯახშიც პატარები იკვებებიან მაღაზიაში ნაყიდი გაზიანი სასმელით, ტკბილეულით და სხვა არაჯანსაღი საკვებით, რაც კატასტროფაა“, - აცხადებს კოღუაშვილი.
აკადემიკოსი სასურსათო კალათის კორექციის აუცილებლობაზეც საუბრობს და დასძენს, რომ მდგომარეობის გამოსასწორებლად სასურსათო კალათაში სურსათისა და არასასურსათო ხარჯი უნდა განაწილდეს 50/50-ზე პრინციპით, საუკეთესო შემთხვევაში, 70/30-ზე, მაგრამ ამ ამისთვის ქვეყანა არ არის მზად არც დღეს და ვერც უახლოეს რამდენიმე წელიწადში, ამასობაში მოსახლეობის კეთილდღეობა მუდმივად უარესდება.
შეგახსენებთ, რომ 2021 წლის ოქტომბერში, წინა თვესთან შედარებით, საარსებო მინიმუმი 7,9 ლარით გაიზარდა.
სტატისტიკის ეროვნული სამსახურის ინფორმაციით, გასულ თვეს შრომისუნარიანი კაცის საარსებო მინიმუმი 224.2 ლარს შეადგენდა, მაშინ როცა 2021 წლის აგვისტოში ეს მაჩვენებელი 216.3 ლარი იყო.
2020 წლის ოქტომბერში საარსებო მინიმუმი 187.7 ლარს შეადგენდა.
მარი ჩიტაია