2022 წლის მარტში, წინა თვესთან შედარებით, სარეზერვო ფულის მოცულობა 67.8 მლნ ლარით (1.4 პროცენტით) გაიზარდა და საანგარიშო პერიოდის ბოლოსთვის 5.0 მლრდ ლარი შეადგინა. ამის შესახებ ინფორმაციას ეროვნული ბანკი ავრცელებს.
საშუალო მაჩვენებლის მიხედვით, წინა თვესთან შედარებით, მონეტარული ბაზა 235.6 მლნ ლარით (4.8 პროცენტით) გაიზარდა. პერიოდის ბოლოსათვის, სარეზერვო ფულის წლიური ზრდის ტემპი -9.9 პროცენტს გაუტოლდა.
საანგარიშო პერიოდში შიდასამთავრობო კონვერტაციებით, ეროვნული ბანკის წმინდა სავალუტო გაყიდვებმა 11.8 მლნ აშშ დოლარი შეადგინა. სავალუტო ინტერვენციებით ეროვნულმა ბანკმა გაყიდა 39.6 მლნ აშშ დოლარი. BMatch პლატფორმის წესებზე დაფუძნებული მექანიზმის გამოყენებით ეროვნული ბანკის წმინდა შესყიდვებმა თვის განმავლობაში 0.9 მლნ აშშ დოლარი შეადგინა. მთლიანობაში, წმინდა უცხოური აქტივები დაახლოებით 50.5 მლნ აშშ დოლარით შემცირდა. მარტში, მთავრობის დეპოზიტებზე არსებული სახსრები 513.9 მლნ ლარით გაიზარდა და მისი მოცულობა პერიოდის ბოლოსთვის 1484.9 მლნ ლარს გაუტოლდა.
აღნიშნული პერიოდის განმავლობაში, რეფინანსირების სესხების მოცულობა წინა თვესთან შედარებით 950.0 მლნ ლარით გაიზარდა და 2,510.0 მლნ ლარი შეადგინა. ერთთვიანი სესხის მოცულობა უცვლელია და 400 მლნ ლარს უტოლდება, ხოლო ერთდღიანი სესხი 52.7 მლნ ლარით შემცირდა. ამავე პერიოდში, მცირე და საშუალო ბიზნესის ლიკვიდობის მხარდამჭერი სესხის ნაშთის ოდენობა 34.0 მლნ ლარით შემცირდა და 537.9 მლნ ლარს შეადგენს. საანგარიშო პერიოდში, განთავსდა და დაიფარა 20-20 მლნ ლარის ნომინალური მოცულობის სადეპოზიტო სერთიფიკატები. მთლიანობაში, საანგარიშო პერიოდში, ბანკების წმინდა დავალიანების მოცულობა 863.2 მლნ ლარით გაიზარდა და პერიოდის ბოლოსთვის, 3,681.2 მლნ ლარს გაუტოლდა. გარდა ამისა, თვის განმავლობაში 12.8 მლნ ლარით გაიზარდა სავალუტო სვოპის მოცულობა. მეორად ბაზარზე სახაზინო ფასიანი ქაღალდების წმინდა შესყიდვამ 50.0 მლნ ლარი შეადგინა, ასევე დაიფარა 103.2 მლნ ლარი და პორტფელის მოცულობა 53.2 მლნ ლარით შემცირდა.
„ზემოაღნიშნული ფულადი ნაკადების მოძრაობის ზეგავლენით, თვის განმავლობაში, სარეზერვო ფულის მოცულობა 67.8 მლნ ლარით გაიზარდა. მათ შორის, ნაღდი ფული მიმოქცევაში - 134.8 მლნ ლარით, ხოლო საქართველოს ეროვნულ ბანკში კომერციული ბანკების ეროვნული ვალუტით განთავსებულ საკორესპონდენტო ანგარიშებზე ნაშთები - 59.4 მლნ ლარით გაიზარდა. ამასთან. კომერციული ბანკების ერთდღიან დეპოზიტებზე არსებული ნაშთების ოდენობა 126.4 მლნ ლარით შემცირდა“, — აღნიშნავენ ეროვნულ ბანკში.