გაყინული ხილ-ბოსტნეულის მწარმოებელი კომპანია „GlenBerries“ ახალი პროექტის რეალიზებას იწყებს. ხონის მუნიციპალიტეტში 117 ჰექტარის ფართობზე ხილ-ბოსტნეულისთვის სათბურები და გადამამუშავებელი ქარხანა აშენდება.
კომპანიის აღმასრულებელი დირექტორის რაფიელ მაღალაშვილის თქმით, შესაბამისი მიწის ნაკვეთი უკვე შეძენილია, პროექტი კი ეტაპობრივად განხორციელდება - 2021 წელს 52 ჰექტრის სათბურები აშენდება, და პარალელურად ქარხნის მშენებლობაც დაიწყება.
პროექტის ჯამური ღირებულება 30 მლნ. ლარია.
ამ დროისთვის „GlenBerries“-ის მთელი წარმოება შიდა ქართლში, ქარელის მუნიციპალიტეტში მდებარეობს. 2018 წელს სახელმწიფოს მხარდაჭერით, კომპანიამ გახსნა საწარმო, რომელიც ძირითადად მაცივრებისგან შედგება, რომლებსაც დღე-ღამეში 10 ტონა პროდუქციის შოკური მეთოდის გაყინვა შეუძლიათ. საწარმოს ასევე 1 200 ტონა მზა პროდუქტის შემნახველი კამერებიც და სხვა აუცილებელი ინფრასტრუქტურა აქვს.
ამავე რეგიონში კომპანია რამდენიმე ნაკვეთს ფლობს, სადაც სპეციალური სასათბურე ტექნოლოგიის გამოყენებით კენკროვანები და ბოსტნეული მოჰყავს. ჯამურად კენკროვანების სათბურის ფართი 31 ჰექტარია, ხოლო ბოსტნეულის 10. ამჟამად სათბურების მშენებლობა კიდევ 10 ჰექტარზე მიმდინარეობს.
საბოლოო პროდუქცია - შოკური მეთოდით გაყინული ხილ-ბოსტნეულია, რომელიც ძირითადად ექსპორტზე ისრაელში და შტატებში გადის. კომპანიის დირექტორის თქმით, გასული წელი კომპანიისთვის საკმაოდ რთული იყო და პრობლემები არა გასაღების, არამედ ნედლეულის დეფიციტის კუთხით იყო.
„2020 წელი ჩვენთვის ძალიან ცუდი იყო. მხოლოდ ჩვენი ნედლეული წარმოებისთვის საკმარისი არაა და ჩვენ პროდუქტებს ადგილობრივი ფერმერებისგან ვყიდულობთ. გასულ წელს ჩვენი საექსპორტო ვალდებულებების შესრულებისთვის აუცილებელი რაოდენობის პროდუქტები ვერ მოვიძიეთ და ამან სირთულეები შეგვიქმნა. ამის გათვალისწინებით ჩვენ საკუთარ საწარმოო ბაზას მაქსიმალურად ვაფართოვებთ, კერძოდ ქარელში დამატებით 10, ხოლო იმერეთში 52 ჰექტრის სათბურებს ვაშენებთ“ - ამბობს რაფაილ მაღალაშვილი.
მისი თქმით, მაღალი მოთხოვნის გამო, 117 ჰექტარზე კენკროვანები გაშენდება.
„მაგალითად, უცხოეთში ძალიან მაღალია მოთხოვნა გაყინულ ლურჯ მოცვზე, ხოლო ადგილობრივ ბაზარზე ახალი კენკრაც ძალიან ძვირია. რაც შეეხება ბოსტნეულს, აქცენტი ისეთ სახეობებზე გაკეთდება, როგორიცაა ბროკოლი, ყვავილოვანი კომპოსტი, სხვადასხვა მწვანილები და ა.შ.“ - განმარტა მაღალაშვილმა.
2020 წელს კომპანია კიდევ ერთი პრობლემის წინაშე აღმოჩნდა. გასულ წელს კომპანია ხახვის და ნივრის გადამამუშავებელი ქარხნის ამოქმედებას გეგმავდა, საწარმო უკვე აშენდა, თუმცა მის ამუშავებას 3,5 მლნ. ლარი სჭირდება. პანდემიის პირობებში კომპანიას საბანკო სესხის მიღება გაუჭირდა და დღეს მენეჯმენტი კრედიტის მიღების მოლოდინშია.
„დღეს ჩვენ ბანკისთვის საჭირო გარანტიების მომზადებაზე ვმუშაობთ და სესხის მიღების იმედი გვაქვს“ - განაცხადა GlenBerries-ის აღმასრულებელმა დირექტორმა.
წყარო: east-fruit.com