კარტოფილ „ფრის“ მწარმოებლები რუსეთისთვის პროდუქციის მიწოდებაზე უარს ამბობენ, ხოლო შიდა გადამუშავების გაზრდის მცდელობები სირთულეებით არის სავსე. ამის შესახებ რუსეთში McDonald's-ის შემცვლელი კომპანიის აღმასრულებელმა დირექტორმა, ოლეგ პაროევმა განაცხადა, რასაც რუსულ РБК-ზე დაყრდნობით Reuters ავრცელებს.

როგორც ცნობილია, McDonald's-მა რუსეთი უკრაინის ომის გამო მოსკოვის წინააღმდეგ დასავლური რეაქციის შემდეგ დატოვა, რომელიც ეკონომიკურ სანქციებს მოიცავდა. მაისში კომპანიამ ყველა რესტორანი, რასაც კი რუსეთში ფლობდა, ადგილობრივ ლიცენზიანტს მიჰყიდა.

12 ივნისიდან რებრენდირებული რესტორნების, „ვკუსნო ი ტოჩკას“ („გემრიელია და მორჩა“) გახსნა დაიწყო. პაროევმა Reuters-ს განუცხადა, რომ ქსელმა გახსნის დღეს, თითქმის, 120 000 ბურგერი გაყიდა.

ახალ მფლობელს სურდა, ხაზი გაესვა, რომ მაღალი ხარისხის სტანდარტები შენარჩუნდებოდა ან გაუმჯობესდებოდა კიდეც და მომხმარებლები დიდ განსხვავებას ვერ შეამჩნევდნენ. თუმცა, სააგენტოს ცნობით, დღეს ის იძულებულია აღიაროს, რომ ქსელი შემოდგომამდე კარტოფილ „ფრის“ დეფიციტს განიცდის, რასაც რუსეთში ცუდ მოსავალსა და მიწოდების ჯაჭვის პრობლემებს აბრალებს.

„რაც ახლა ხდება, არის ის, რომ ცნობილი მოვლენების გამო ბევრმა უცხოურმა კომპანიამ, კარტოფილის თითქმის ყველა მსხვილმა მწარმოებელმა ამ პროდუქტის რუსეთისთვის მიწოდებაზე უარი თქვა”, - განუცხადა ბიზნესარხ РБК TV-ს ოლეგ პაროევმა.

მისი თქმით, კარტოფილ „ფრის“ მწარმოებელი ქარხნები როგორც „მეგობრულ,“ ისე „არამეგობრულ“ ქვეყნებში ხუთ ან ექვს მსხვილ კომპანიას ეკუთვნის, რომელთა სათაო ოფისებიც ე.წ. არამეგობრულ ქვეყნებში არის დაფუძნებული. შესაბამისად, მათ რუსეთისთვის მიწოდებაზე უარი განაცხადეს.

როგორც ცნობილია, მოსკოვი „არამეგობრულად“ მიიჩნევს ქვეყნებს, რომლებმაც რუსეთის წინააღმდეგ სანქციები უკრაინაში მისი ქმედებების გამო დააწესეს.

პაროევი აცხადებს, რომ წელს რუსეთში იმ ჯიშის კარტოფილის მოსავალში დეფიციტია, რომელიც „ფრის“ დასამზადებლად არის საჭირო. ამასთან, ის ახლო მომავალში სხვა პრობლემებსაც არ გამორიცხავს, რადგან რუსეთში „ფრის“ დასამზადებლად კარტოფილის დამუშავება მხოლოდ რამდენიმე საწარმოს შეუძლია.

bpn.ge