„აქ ნამდვილად ვეთანხმები [პრეზიდენტს] რომ ქვეყნის მომავალი არ უნდა გადაყვეს არავის და მე გამიჩნდა ეჭვი, რომ ის აპირებს შეიწყალოს გვარამია, რითაც შარს ააცილებს ქვეყანასაც და ქართულ ოცნებასაც, რომლის წყალობითაც ის გახდა პრეზიდენტი“, -  ამის შესახებ, რადიო „კომერსანტის“ გადაცემაში „კომერსანტი live”  Gipa- ს პროფესორმა და საერთაშორისო საკითხების ექსპერტმა თორნიკე შარაშენიძემ ისაუბრა.

მისი თქმით ნიკა გვარამიას დაჭერით “ქართულმა ოცნებამ“ ძალიან წააგო  და რეზოლუციის სახით ძალიან დიდი შარი მიიღო.

„თუმცა რაც არ უნდა მოხდეს, საქართველო ალბათ მიიღებს ევროკავშირის წევრობის კანდიდატის  სტატუსს, თუმცა რაღაც დათქმით. რაც შეეხება ივანიშვილის დასანქცირებას, ამაზე საუბარი არასერიოზული მგონია, რადგან ჯერ ერთი საფრანგეთის მოქალაქეა და  მეორეც იმისათვის, რომ ადამიანი დაასანქცირო მტკიცებულებაა საჭირო და რა მტკიცებულება არსებობს მასთან მიმართებაში მე არ მესმის“ -  აღნიშნა თორნიკე შარაშენიძემ.

შარაშენიძის თქმით “ქართული ოცნება“ ევროკავშირის ყველა პირობას დათანხმდება, თუმცა საინტერესო როდის და რა ვადაში შეასრულებს ამ პირობებს. თორნიკე შარაშენიძემ ასევე განმარტა, ევროკავშირის წევრობის კანდიდატის სტატუსი საქართველოს აძლევს იმის საშუალებას, რომ ევროკავშირისგან მეტი მოითხოვოს.

„მე ვფიქრობ, რომ დღეს და ხვალ, რომ გაგვიღონ კარი ევროკავშირში შესვლაზე არ უნდა ვიჩქაროთ, რადგან ძალიან ღარიბი ქვეყანა ვართ და ელემენტარულად დაიცლება ქვეყანა, ჩვენ უნდა გამოვიყენოთ კანდიდატის  სტატუსი, რომ რაც შეიძლება მეტი დახმარება მივიღოთ ევროკავშირისგან, განვავითაროთ ეკონომიკა, ავწიოთ ცხოვრების დონე და ევროკავშირში შევიდეთ თავაწეულები“. -  აღნიშნა თორნიკე შარაშენიძემ. 

თაკო კვაჭანტირაძე