სამოქალაქო აქტივისტმა ბესიკ წულეისკირმა სენაკის ყოფილი რაიონული საავადმყოფოს ეზოში გაშლილ კარავში პროტესტის ნიშნად პირი ამოიკერა. ის ხელისუფლებისგან ითხოვს, განაახლონ 8 წლის წინ დახურული ყოფილი სამედიცინო დაწესებულების შენობა. აქტივისტმა პირი „ფეისბუკზე პირდაპირი ჩართვისას ამოიკერა, მანამდე ბესიკ წულეისკირმა სამეგრელო-ზემო სვანეთში სახელმწიფო რწმუნებულის ადმინისტრაციას და ცენტრალურ ხელისუფლებას მიმართა.

„მე ვიკერავ პირს, ასე გამოვხატავ პროტესტს. იქნებ ამან მიიქციოს ხელისუფლების ყურადღება. ადგილობრივი ხელისუფლების წარმომადგენლებთან საქმე არ მაქვს, მათთან საუბარს აზრი არ აქვს. მოვითხოვ, ცენტრალურმა ხელისუფლებამ გამოაგზავნოს წარმომადგენელი სენაკში, დაინტერესდეს, რა არის ჩვენი სამართლიანი მოთხოვნა. დაინტერესდეს ცენტრალური ხელისუფლებიდან კომპეტენტური პირი ან სამეგრელო-ზემო სვანეთის რწმუნებულის ადმინისტრაციიდან კომპეტენტური პირი“, - განაცხადა ბესიკ წულეისკირმა. ის ხელისუფლებას 24-საათიან ვადას აძლევს და პროტესტის უკიდურესი ფორმით იმუქრება.

ბესიკ წულეისკირთან ერთად ყოფილი საავადმყოფოს ეზოში გაშლილ კარავში იმყოფება კიდევ ერთი სამოქალაქო აქტივისტი აპოლონ გარუჩავა. მან რადიო თავისუფლებას უთხრა, რომ პროტესტს ჯერჯერობით ხელისუფლების არცერთი წარმომადგენელი არ გამოხმაურებია. გარუჩავამ აღნიშნა, რომ ადგილზე იმყოფებოდნენ მხოლოდ პოლიციელები, სახანძრო მანქანა და სასწრაფო დახმარების ჯგუფი. აპოლონ გარუჩავას ინფორმაციით, ბესიკ წულეისკირის ჯანმრთელობის მდგომარეობა ამ დროისთვის დამაკმაყოფილებელია და ის აგრძელებს პროტესტს.

აპოლონ გარუჩავას სიტყვებით, სენაკში საავადმყოფო წლების წინ დაიხურა და ერთი კერძო კლინიკა, რომელიც ქალაქში ფუნქციონირებს, მოქალაქეთა მოთხოვნებს ვერ აკმაყოფილებს - მათ სამედიცინო სერვისების მისაღებად ქუთაისსა და ზუგდიდში უწევთ გამგზავრება, რაც დამატებით დროსთან და ხარჯებთან არის დაკავშირებული. აქტივისტის განცხადებით, ეს არის არა მხოლოდ აქციის მონაწილეების, არამედ სენაკის მცხოვრებლების მოთხოვნა, რასაც 2-წლიანი პროტესტის მიუხედავად, ხელისუფლება ყურადღებას არ აქცევს.

„ხალხის ნება უნდა აღსრულდეს და უნდა აღდგეს საავადმყოფო, რომელიც ემსახურებოდა მოქალაქეებს. შენობა უკვე გატანილია აუქციონზე და თუ გაიყიდება, ჩვენი მოთხოვნაა, მფლობელმა ისევ საავადმყოფო აღადგინოს. ჯერჯერობით ასეთი პირობა აუქციონის მოთხოვნებში არ დევს“, - განმარტავს გარუჩავა. გარდა საავადმყოფოსი, აქტივისტები სენაკში კინოთეატრის აღდგენასაც ითხოვენ.

სამოქალაქო აქტივისტების მოთხოვნასთან დაკავშირებით სამეგრელო-ზემო სვანეთში სახელმწიფო რწმუნებულის ადმინისტრაციაში ჯერჯერობით კომენტარი არ გაუკეთებიათ.

სენაკის ყოფილი რაიონული საავადმყოფოს პრობლემები 2009 წლიდან შეექმნა, როცა თანამშრომლების დიდმა ნაწილმა სამედიცინო დაწესებულება სახელფასო დავალიანების გამო დატოვა. საავადმყოფო 2014 წელს დაიხურა. ფინანსურის გარდა, სამედიცინო დაწესებულების თანამშრომლები მძიმე ინფრასტრუქტურულ პრობლემებზე და საჭირო აპარატურის უქონლობაზე საუბრობდნენ.

radiotavisupleba.ge