მეცხვარეთა ასოციაცია ხელისუფლებას ცხვრის გადასარეკი ტრასის პრობლემის მოგვარებას კიდევ ერთხელ სთხოვს. როგორც მეცხვარეთა ასოციაციის ხელმძღვანელი ბექა გონაშვილი სოციალურ ქსელში წერს, ეს რაც ხდება ამ 1 კვირის განმავლობაში რუსთავთან უბრალოდ სირცხვილია.

„და სირცხვილი ისაა რომ 2010 წლიდან მოყოლებული დგას პრობლემა. როცა ცხვრის ტრასის რეგისტრაცია დავიწყეთ 2010 წელს, 2011 წელს მაშინდელი ხელისუფლების მოთხოვნით შეიცვალა ტრასამ მიმართულება და როგორც დღევანდელი ავტობანის ქვეშ გადავკვეთავთ გზას უნდა ავიდეთ პირდაპირ “რუსთავის ჯვართან” და ისე გადავიდეთ იალღუჯაზე, რადგან ძველი ტრასა უშლიდა დღევანდელი ავტობაზრობის მოწყობას და ასე შემდეგ ინფრასტრუქტურას, ჩვენც დავყაბულდით, მიუხედავად იმისა რომ გზა გავირთულეთ, 200 ჰექტრამდე დასასვენებელი მოედანი დავკარგეთ და ასევე დავკარგეთ დასაწყურებელი, რომელიც იქ გზაზე გხვდებოდა!!!

მაშინვე ვითხოვდით რომ აი ამ ახალ გზაზე რომ გაგვიშვით, იქნება და მიწის ნაკვეთები რაც არის დაელაპარაკეთ ამ ხალხს და მოვუნაცვლოთ თქო, იმ 200 ჰექტრიდან თუნდაც. და პრობლემა არ იქნებოდა! ახლა კი დადგა პრობლემა! გასავლელი 350 მეტრი ჩაგვიხერხეს და არ გვატარებენ, მეტიც ითხოვენ ცხვრებით გადახდას, იქვეა “ლურჯი” მარშუტკით ვაჭრები, რომლებსაც შესვავენ ამ ”ანაბრებულ” ცხვარს მეცხვარეებიდან და ჰყიდიან…

კერძო მიწაა, კერძო საკუთრებაა და მართალია, მაგრამ კითხვა მაქვს, ეს ხომ რეკეტია? როცა შენ ეკონომიკურ საქმიანობას ეწევი (გატარებაში ითხოვ თანხას, ცხვარს) და ამისთვის არანაირ ფისკალურ დოკუმენტს (ჩეკი, ჩგდ, ჩარიცხვა) არ ქმნი!

თანაც სამწუხაროდ მადა ძალიან დიდი აქვთ, 2-დან 5 ცხვირამდე ფარაზე!!! 350 მეტრის გავლაში!!! უბრალოდ გავლაში!!!

შესაბამისად ჩვენ ვაპირებთ ხვალვე მივმართოთ საქართველოს მთავრობას გავაკეთეთ წერილიც და გვაქვს ხელმოწერებიც, იმ ფერმერების ვინც დღეს იქ ადგილზე შეეჩეხნენ ამ პრობლემას, თუმცა ყველა ის ფერმერი ვისაც გადაახდევინეს თუ სხვა მხრივ შეფერხება შეუქმნეს ყველა მზად არის უახლოეს დღეებში ჩამოვიდეთ თბილისი და გავაპროტესტოთ ჩვენი უფლებების ხელყოფა!

აქვე მინდა განსაკუთრებული მადლობა გადავუხადო პირადად ქვემო ქართლის გუბერნატორს, რომელმაც ყველაფერი გააკეთა იმისთვის რომ აგვერიდებინა თავი ამ გზის გადამკეტავებისთვის და მოიპოვა უფლება რათა რუსთავის ავტოდრომით გვესარგებლა, საუბარია ერთი პატარა ღობის იქიდან!

მოვუწოდებ ეკონომიკის და სოფლის მეურნეობის სამინისტროებს სასწრაფო წესით დაგვეხმარეთ, წელს ძალიან ცუდი წელია, უბალახობაა და ჯერ მეცხვარეების ნაწილი კიდევ მთაშია, ან ახალი დაძრულია, რათა ბარის საძოვრებს მომფრთხილებოდნენ და ძირითადი მასა ახლა გამოივლის, დღეში დაახლოებით 20-30 ფარა და თავისი მსხვილფეხა საქონლით… გთხოვთ ამჯერად მაინც არ გადავდოთ მთლიანად პირუტყვის გადასარეკი ტრასის მოგვარების საკითხი და ერთხელ და სამუდამოდ გავიდეთ ბოლოში, ვიცოდეთ ვისი რა არის და იყოს ადვილად გარჩევაში დემარკაციით გამიჯნული“, წერს სოციალურ ქსელში ბექა გონაშვილი.