რუსმა ბიზნესმენმა რომან აბრამოვიჩმა თურქული საფეხბურთო კლუბი Goztepe შეიძინა, ამის შესახებ ინფორმაცია D-Smart Spor ავრცელებს.
წყაროს ცნობით, მხარეები უკვე შეთანხმდნენ გარიგების პირობებზე, რომლის ოფიციალური განცხადება პარასკევს იგეგმება.
გოზტეპე მეჰმეთ სეპილმა 2014 წელს 7,5 მილიონ დოლარად იყიდა. თურქეთის ჩემპიონატში იზმირის გუნდმა ზედიზედ რვა მატჩი წააგო და მე-18 ადგილზეა. თურქეთის ჩემპიონატის დასრულებამდე შვიდი ტურია დარჩენილი.
10 მარტს დიდი ბრიტანეთის მთავრობამ რუსეთის უკრაინაში შეჭრის გამო აბრამოვიჩის წინააღმდეგ სანქციები დააწესა.
ბიზნესმენის აქტივები დაბლოკეს, მათ შორის საფეხბურთო კლუბი ჩელსი, რომელიც აბრამოვიჩმა მანამდე გაყიდვაში გამოუშვა. ლონდონურ კლუბს არ შეუძლია განახორციელოს კომერციული საქმიანობა: გააფორმოს კონტრაქტები ფეხბურთელებთან, გაყიდოს ბილეთები და ატრიბუტები.
Forbes-მა რომან აბრამოვიჩის ქონება 6,9 მილიარდ დოლარად შეაფასა, გასულ წელთან შედარებით ბიზნესმენმა $7,6 მილიარდი დაკარგა.
vedomostisport.ru