ფარმაცევტული კომპანიების წარმომადგენელთა ასოციაციის დირექტორის, ირაკლი მარგველაშვილის განცხადებით, მედიკამენტებზე გაწეული ხარჯების შესამცირებლად საკანონმდებლო ბაზის ცვლილებაა საჭირო.

როგორც მარგველაშვილ განმატავს, მოქალაქეები ბევრს ხარჯავენ მედიკამენტებზე და ხშირ შემთხვევაში, მათი ნაწილი საერთოდ არ სჭირდებათ.

პირველ რიგში, უნდა ვიცოდეთ სამედიცინო დაწესებულებებში ექიმები რა წამლებს უწერენ პაციენტებს და რამდენად ადეკვატურია ეს წამლები არსებული დაავადების სამკურნალოდ. ხარჯს ძალიან ზრდის არაკეთილსინდისიერი ფარმაცევტული კომპანიების წნეხი ექიმებზე. მათი მხრიდან ხდება ექიმების ფინანსური მოტივაცია გამოწერილი მედიკამენტების სანაცვლოდ. ეს კი პირდაპირ კავშირშია პაციენტის ჯიბესთან. ეს მავნე პრაქტიკა უნდა აღიკვეთოს, რაც ძალიან მოკლე ვადაში მოგვცემს შედეგს და შეამცირებს ხარჯებს. სწორედ ამიტომაა საჭირო საკანონმდებლო ცვლილება“,- აცხადებს მარგველაშვილი.

მარგველაშვილის თქმით, პრობლემის მოსაგვარებლად ასევე საჭიროა საყოველთაო ჯანდაცვის სისტემის ოპტიმიზაცია და მეტი რესურსის მიმართვა მედიკამენტებზე. 

„ჩვენ ვერცერთ ფარმაცევტულ კომპანიას ვერ ვუბრძანებთ, რომ ფასები შეამციროს, მაგრამ შეგვიძლია ამას მივაღწიოთ თუ შევქმნით შესაბამის სადაზღვევო სისტემას. ეს იქნება მედიკამენტის ფინანსირებაში ჩარევა, ამისათვის საჭირო იქნება საყოველთაო ჯანდაცვის პროგრამის ოპტიმიზაცია. ვგულისხმობ იმას, რომ პროგრამაში მედიკამენტზე უფრო მეტი თანხა დაიხარჯება და ეკონომია მოხდეს სხვა მიმართულებით“,- აცხადებს მარგველაშვილი.

კონკურენციის სააგენტოს ფარმაცევტული ბაზრის მონიტორინგის შუალედური ანგარიშის თანახმად, მედიკამენტებზე მაღალი დანახარჯები მომხმარებლების ნაკლები ინფორმირებულობითაა განპირობებული, რადგან შედარებით იაფი გენერიკული და სხვადასხვა ჩამნაცვლებელი მედიკამენტების არსებობის შესახებ მომხმარებლებს ინფორმაცია არ აქვთ. 

სააგენტომ 6 ჯგუფის მედიკამენტების ანალიზის შედეგად დაადგინა, რომ თავისუფალი არჩევანისა და ბრენდირებული მედიკამენტების გენერიკებით ჩანაცვლების შემთხვევაში, პაციენტი 2016-2020 წლებში დაზოგავდა საშუალოდ 16 მილიონ ლარს და ამავე დროს იდენტურ სამკურნალო ეფექტს მიიღებდა.

წყარო: businessformula.ge