ჯანდაცვის მსოფლიო ორგანიზაციის გამოცხადებული პანდემიის ფონზე, როცა თითქმის ყველა ღონისძიება გაუქმებულია და მრავალი პროექტი - გაურკვეველი ვადით გადადებული, შეიძლება ერთგვარ სიმბოლოდაც ჩაითვალოს არდის და პარლამენტის ეროვნული ბიბლიოთეკის ეს ისტორიული მნიშვნელობის წამოწყება, რომლის ათვლის წერტილი სწორედ დღევანდელი მსოფლიოს მაჯისცემას ემთხვევა.
პროექტი “მედმატიანე” წინა საუკუნეების გამოჩენილი სამედიცინო მოღვაწეების ნაცნობი თუ უცნობი ფოტოების გაციფრულებას გულისხმობს. პროექტის მემორანდუმის ხელმოწერა პარლამენტის ეროვნული ბიბლიოთეკის ისტორიულ დარბაზში ჩატარდა. არსებული მოცემულობის გათვალისწინებით, არხალხმრავალ გარემოში და უსაფრთხოების პროტოკოლის სრული დაცვით, თანამშრომლობის მემორანდუმს ხელი ბიბლიოთეკის გენერალურმა დირექტორმა გიორგი კეკელიძემ და არდის აღმასრულებელმა დირექტორმა - მიხეილ ჯაფარიძემ მოაწერეს.
“დღეს, როცა ყველაზე მეტად მნიშვნელოვანია ექიმების გამხნევება დედამიწის ყველა კუთხეში, ჩვენ განვიზრახეთ ქართველი ექიმების ფასდაუდებელი შრომა კიდევ უფრო შეუფასებელი გავხადოთ და გადავცეთ მათ გამამხნევებელი მესიჯი, წინა საუკუნეების ცნობილი ექიმების ფოტოებისა და მათი უნიკალური ისტორიების ციფრულ სამყაროში გადმოტანით. თითქმის მივიწყებას მიცემული, ძველებურ ალბომებში ჩაკარგული შავ-თეთრი გამოსახულებები დაიბრუნებენ ახალ სიცოცხლეს, ალტერნატიული ინტერნეტსივრცე ხომ უსასრულო ინფორმაციას იტევს და გაცილებით ფერადია, ვიდრე წარსული” - ამბობს პარლამენტის ეროვნული ბიბლიოთეკის დირექტორი“ - გიორგი კეკელიძე.
პროექტის ფარგლებში, სადაზღვევო კომპანია “არდი” მთელი საქართველოს მასშტაბით მოიძიებს საზოგადოების სხვადასხვა თაობებში გაფანტულ, გასული საუკუნის ცნობილი ექიმების ფოტოებს მათი შთამომავლების საოჯახო ალბომებში, მოახდენს მათ შეფასებას, დახარისხებას და უკვე ფინალურ ეტაპზე - მათ გაციფრულებას. გაციფრულება ეს უახლესი ტექნოლოგიური პროცესია, რომელიც მხოლოდ სპეციალური დანადგარების მეშვეობით არის შესაძლებელი. პარლამენტის ეროვნულ ბიბლიოთეკას უკვე დაუგროვდა ამის უდიდესი გამოცდილება ციფრული ფოტომატიანეს შექმნით, სადაც დღეისთვის უკვე ნახევარ მილიონამდე ფოტოა შეტანილი.
“ცნობილი ქართველი ექიმების ფოტოების გაციფრულებასთან ერთად, ეს პროექტი ასევე გულისხმობს საზოგადოებისთვის უცნობი ექიმების გამოვლენას, თავისი უნიკალური ისტორიებით, რომელიც დღეს მხოლოდ მათი შთამომავლების ვიწრო წრისთვის შეიძლება იყოს შემონახული. ზოგჯერ ერთი ასეთი ისტორია, ან სულაც ფოტო - ერთი წიგნის წაკითხვის ტოლფასია. იმედი გვაქვს, რომ ქართველი ექიმების ეს ციფრული ფოტომატიანე, იქნება ციტადელი თანამედროვე და მომავალი თაობის ექიმებისთვის, ნიშნად იმისა, რომ მათი საქმიანობა არ არის ჩვეულებრივი პროფესია, არამედ ის, რასაც ისტორია არასოდეს წირავს და საგულდაგულოდ ინახავს.” - აცხადებს სადაზღვევო კომპანია არდის პროექტის კოორდინატორი, ექიმი, თამარ გოდერიძე.
არდი
