მეფუტკრეები თაფლის ანალიზების სუბსიდირებას ითხოვენ. ამის შესახებ „კომერსანტს“ საქართველოს მეფუტკრეთა გაერთიანების თავმჯდომარემ ალეკო პაპავამ განუცხადა. მეფუტკრის განმარტებით, იმისათვის, რომ ქართული თაფლი ექსპორტზე გაიტანონ, საჭიროა აკრედიტირებული ლაბორატორიის დასკვნა, რომლის საფასურიც ძალიან მაღალია და მეფუტკრეებისთვის ამ თანხის გადახდა პრობლემას წარმოადგენს. ალეკო პაპავა აცხადებს, რომ მათთვის საჭირო სუბსიდირების სახით გამოყოფილი თანხის ოდენობა 150 000 ლარს შეადგენს. საქართველოს მეფუტკრეთა გაერთიანება საქართველოს მთავრობას სქემას სთავაზობს რომელიც პაპავას თქმით, აღნიშნულ პრობლემას მოაგვარებს.

„ყველაზე მნიშვნელოვანი პრობლემა,რომელიც გვაქვს არის ის, რომ ერთი-ორი საწარმოა, რომელთანაც ვთანამშრომლობთ, ეს რაოდენობა არ არის საკმარისი. უფრო მეტი საწარმო გვჭირდება და ამ კუთხით ბევრი სამუშაოა. მეორე პრობლემაა ანალიზების სუბსიდირება. ერთი ნიმუში დაახლოებით 3 000 ლარამდე ჯდება,რაც მეფუტკრეს ძალიან მძიმე ტვირთად აწევს. გვინდა სოფლის მეურნეობის სამინისტოს შევთავაზოთ სუბსიდირების სქემა. პირველ ხარჯები, რომელიც თაფლის ნატურალურობას სჭირდება დაახლოებით 150 ლარია, რასაც თვითონ მეფუტკრე გადაიხდის. ასევე საჭიროა სკრინინგი, რომლის ღირებულებაც დაახლოებით 700 ლარია. შესაძლებელია სახელმწიფოსთან მოლაპარაკება, ამ თანხის პროცენტულ გადანაწილებაზე, რადგან 700 ლარი მეფუტკრისთვის ცოტა არაა.

ყველაზე მნიშვნელოვანი არის ის, რომ ექსპორტს ყველა მეფუტკრე ვერ ახდენს. ეს უნდა განახორციელოს საწარმომ, რომლებიც თაფლის კუპაჟირებას აკეთებენ. წარმოიდგინეთ, საწარმოს რამდენი ნიმუში დაუგროვდება. რისკების შესამცირებლად და საწარმოების ინტერესის გასაზრდელად გვჭირდება სუბსიდირება, შედეგად 50 პროცენტს სახელმწიფო გადახდის ​50 პროცენტს შუამავალი კომპანია. ველოდებით სოფლის მეურნეობის სამინისტროსგან პასუხს, რათა დავსხდეთ და ჩვენს პრობლემებზე ვილაპარაკოთ, თუ რა გვჭირდება დარგის განვითარებისთვის, შემაფერხებელი ფაქტორები რა არის, რათა პრობლემები ერთობლივად დავძლიოთ. გვაქვს აშკარა გაუმჯობესებული შედეგი, ქართული თაფლის ნიმუშებში დარღვევები შემცირდა, მომავალ წელს კიდევ უფრო კარგ შედეგზე უნდა გავიდეთ“, განაცხადა ალეკო პაპავამ.

სურსათის ეროვნული სააგენტოს სურსათის უვნებლობის დეპარტამენტის ხელმძღვანელი გია მიქაძე „კომერსანტთან“ აცხადებს, რომ საქართველოში არსებობს ლაბორატორია, რომელსაც ათვისებული აქვს, სხვადასხვა მაჩვენებლების კონტროლი და ყველა პოტენციურ ექსპორტიორს შეუძლია თაფლის შესაბამისი ანალიზებია გაკეთება, რომელიც ევროკავშირის ქვეყნებისთვის იქნება მისაღები, რადგან გია მიქაძის განმარტებით კვლევა დასავლური მეთოდით კეთდება.

„ჩვენ 2020 წლიდან თაფლს საქართველოში გამოვიკვლევთ, გარემოს დაცვის და სოფლის მეურნეობის სამინისტომ აითვისა ყველა ის მეთოდი, რომლითაც ხდება სხვადასხვა ფარმაკოლოგიური ნივთიერებების და სხვა დამაბინძურებელი ნივთიერების აღმოჩენა. ასევ გაიცემა ვეტერინალური სერტიფიკატი, რომელიც უნდა ახლდეს საქართველოში წარმოებულ თაფლს, რათა ევროკავშირის ბაზარზე გავიდეს.

მეწარმეებს აქამდე პრობლემა ჰქონდათ იმასთან დაკავშირებით, რომ თაფლის ნიმუშები უნდა გაეგზავნათ საზღვარგარეთ და გამოეკვლიათ იქ. ეს უფრო მეტ ხარჯებთან იყო დაკავშირებული, არა მარტო ლაბორატორიის მომსახურების, არამედ ტრანსპორტირების კუთხითაც. როდესაც ეს შესაძლებლობა გაჩნდა, კიდევ უფრო გაიაფდება ნიმუშების კვლევის ღირებულება. ლაბორატორიული კვლევების სუბსიდირების კუთხით ლაპარაკი მიმდინარეობს, მაგრამ ამჟამად ვერ გეტვით რა ეტაპზეა ეს ნაწილი, თუმცა, შესაძლებელია ესეც განხორციელდეს. ასევე არსებობს წარმოშობის სერტიფიკატი და DCFTA ხელშეკრულება, რომელიც საშულებას გვაძლევს ე.წ ევრო ერთის აღების შემთხვევაში თაფლი ევროკავშირის ბაზარზე უფრო ნაკლები და ზოგ შემთხვევაში ნულოვანი დაბეგვრით გავიტანოთ“, - განაცხადა გია მიქაძემ.

ბაჩო ადამია