შემცირებული მომხმარებლები, განახევრებული გაყიდვები, გაუფასურებული ლარი და წერტილოვანი შეზღუდვები. რთული ეპიდემიოლოგიური და პოლიტიკური სიტუაციის გამო საქართველოში ბიზნესის კეთება ყოველდღე რთულდება. კომპანიების ნაწილი უკვე გაკოტრდნენ ხოლო ნაწილმა ბაზარი საქართველოს ბაზარი დატოვა. „კომერსანტი“ დაინტერესდა კოვიდ 19 -ის პირობებში როგორ აგრძელებენ ოპერირებას ისეთი საერთაშორისო ბრენდები, როგორიცაა „The North Face“, „timberland“, „Diesel“ და „Dainese“. ამ ოთხ ბრენდის ექსკლუზიური ფრენჩაიზ პარტნიორი საქართველოში „მეგასპორტია“. კომპანიის დირექტორის მოადგილე ბიჭიკო ყელბერაშვილი აცხადებს, რომ „მეგასპორტს“ რთული ეკონომიკური მდგომარეობა აქვს. მისი თქმით, კომპანიის გაყიდვები განახევრებულია, მიზეზი ეროვნული ვალუტის გაუფასურება და კოვიდ 19-ია. ყელბერაშვილი გვიყვება, რომ ჯერჯერობით კომპანიას მაღაზიებისა და თანამშრომლების მხრივ შემცირება არ აქვს.
„ლარის კურსის გაუფასურების და ვირუსის გამო, კომპანიაში რთული ვითარებაა შექმნილი. გაყიდვები საგრძნობლად შემცირდა, ფაქტობრივად განახევრებულია, მომხმარებელიც მაღაზიებში ნაკლებად დადის. თუ აქამდე 130 ევრო 400 ლარი იყო ახლა ეს თანხა ძალიან დიდია, სხვაობა ლარში მნიშვნელოვნად გაიზარდა. ქართველ მომხმარებელს ჩვენი პროდუქციის ყიდვა უჭირს, ხარჯი გაეზარდათ, შემოსავლები კი იგივე დარჩათ. მარტში გაყიდვები 30 პროცენტით დავარდა, ახლა კი ეს რიცხვი 50 პროცენტამდე გაიზარდა. კომპანიის ძირითადი ნიშა სამთო სათხილამურო პროდუქცია, აქედან გამომდინარე დიდწილად ტურიზმზე ვიყავით დამოკიდებულები, დღეს კი ქვეყნაში ტურისტები არ არიან. არ ვიცით როგორი ზამთარი იქნება, იქნება თუ არა საერთოდ ტურისტული სეზონი. სეზონის მიხედვით ველოდებით, როგორ განვითარდება მოვლენები“, - განაცხადა ბიჭიკო ყელბერაშვილმა.
„მეგასპორტის“ დირექტორის მოადგილე აცხადებს, რომ ზიანის აღმოფხვრას, რომელიც კომპანიას კორონავირუსით და ლარის კურსის გაუფასურებით მიადგა მინიმუმ ორი წელი დასჭირდება. ბიჭიკო ყელბერაშვილი ამბობს, რომ კონტრაქტების გადახედვა საერთაშორისო ბრენდებთან ჯერჯერობით არ განიხილება, თუმცა ამბობს იმასაც, რომ სიტუაცია რთულია:
„დაგეგმილი არ არის არც ერთი საერთაშორისო ბრენდის გასვლა, თუ მდგომარეობა მნიშვნელოვნად არ გართულდა. ბრენდებთან კონტრაქტებს კბილებით ვიჭერთ, მაგრამ ძალიან გვიჭირს. მაქსიმალურად გიწყობენ ხელს, მაგრამ კონტრაქტებში არის გარკვეული პირობები რომელიც უნდა შესრულდეს, წინააღმდეგ შემთხვევაში გადახდის პირობები იცვლება. წლებია ამ საქმიანობას ვეწევით, ვცდილობთ გავიზარდოთ, სხვა ბრენდები იყოს საქართველოში წარმოდგენილი. დაგეგმილი გვქონდა ახალი ბრენდების შემოყვანა, მაგრამ ამ ეტაპზე ყველანაირი მოლაპარაკება შეჩერებულია“, - განმარტავს ბიჭიკო ყელბერაშვილი.
კიდევ ერთი საკითხი, რომელზეც ბიჭიკო ყელბერაშვილი, ამახვილებს ყურადღებას ქვეყნაში მიმდინარე პოლიტიკური პროცესებია. „მეგასპორტის“ დირექტორის მოადგილე აცხადებს, რომ მასშტაბური მიტინგები სავაჭრო მოლების სიახლოვეს გაყიდვებს ანულებს.
„გარეთ მიმდინარე პროცესები მომხმარებელზეც აისახება. სამი მაღაზია გვაქვს გალერია თბილისში, არ ვიცი რამდენად გააგრძელებს ეს მოლი ფუნქციონირებას, როდესაც გარეთ ამდენი ხალხი იქნება. ადრე როდესაც მსგავსი შემთხვევები იყო გაყიდვები ნულს უტოლდებოდა“, - ამბობს ბიჭიკო ყელბერაშვილი.
„The North Face“, „timberland“, „Diesel“ და „Dainese“ ექსკლუზიური ფრენჩაიზ პარტნიორი კომპანიისთვის ახლა ყველაზე რთული იმპორტის დღგ-ს წინასწარ გადახდაა. კომპანიაში იმედი აქვთ რომ სახელმწიფო ქვეყნაში შექმნილ რთულ მდგომარეობას გაითვალისწინებს და ბიზნეს საშეღავათო პერიოდს დაუწესებს.
„თუ იმპორტის დღგ წინასწარ არ გადაგვახდევინა სახელმწიფომ ეს იქნება იდეალური. ძალიან რთულია ფულის წინასწარ გადახდა, რადგან იმ ფულსაც კი რთულად ვაგროვებთ რომელიც მომწოდებელს უნდა გადავურიცხოთ. ჩამოვა თუ არა პროდუქტი გაყიდული არ გვაქვს და საბაჟოზე თანხას ვიხდით, უმეტეს შეთხვევაში ყვითელ და წითელ დერეფანში ხვდება რაც ნიშნავს იმას, რომ სანამ არ გადავიხდით ტვირთს ვერ გავიტანთ. მანამდე იყო გარკვეული შეღავათები იმ კუთხით, რომ განბაჟებიდან 20 დღე გვქონდა ვადა დღგ-ს გადახდის. ეს დიდი დახმარება იქნება ბიზნესისთვის, იმედი გვაქვს რომ ამას გაითვალისწინებენ“,- განაცხადა ბიჭიკო ყელბერაშვილმა.
ბაჩო ადამია