ვაქცინაციის შემდეგ დაღუპული ახალგაზრდა ახალციხელი ექთნის, მეგი ბაქრაძის საქმეზე ბრალდებულ ექიმს, ვიოლეტა ინასარიძეს მოსამართლე თეონა ეპიტაშვილმა აღკვეთის ღონისძიებად გირაო შეუფარდა. თბილისის საქალაქო სასამართლოში სასამართლო სხდომა დღეს, 29 დეკემბერს გაიმართა.
პროკურატურა ვიოლეტა ინასარიძისთვის აღკვეთის ღონისძიებად 5 000 ლარიან გირაოს ითხოვდა, ადვოკატი თვლიდა, რომ აღკვეთი ღონისძიების შეფარდების საფუძველი არ არსებობდა. საბოლოოდ სასამართლომ ექიმს 4 000 ლარიანი გირაო შეუფარდა - ამ თანხის გადახდისთვის მას 30 დღის ვადა აქვს.
სასამართლოს დღეს მიღებული გადაწყვეტილება არ ნიშნავს, რომ საქმის განხილვა სასამართლოში დასრულდა - გირაო არის აღკვეთის ღონისძიება განაჩენის გამოცხადებამდე.
ინასარიძეს ბრალი წაყენებული აქვს "სისხლის სამართლის კოდექსის" სისხლის სამართლის კოდექსის 130-ე მუხლის მეორე ნაწილით (ავადმყოფის განსაცდელში მიტოვება, რამაც მისი სიცოცხლის მოსპობა გამოიწვია). მას სამიდან ხუთ წლამდე პატიმრობა ემუქრება.
ვიოლეტა ინასარიძე იყო ადამიანი, რომელიც 2021 წლის 18 მარტს, როცა ახალგაზრდა ქალს ვაქცინაცია ჩაუტარდა, ჟურნალისტებს ეუბნებოდა, რომ მას საჭირო დახმარება მან აღმოუჩინა. მოგვიანებით გაირკვა, რომ მან არამხოლოდ მედიას, არამედ გამოძიებასაც მიაწოდა ცრუ ჩვენება და ამის გამო პასუხისგებაშიც მისცეს. სასამართლო სხდომაზე ვიოლეტა ინასარიძემ თქვა, რომ თავს დამნაშავედ არ მიიჩნევს.
„შემთხვევით მოვხვდი მე მანდ [რეგისტრატურაში]. ჩემთვის არავის დაურეკავს, "მოდი, ცუდად გახდა", არავის არ უთქვამს, "მოდი შენ მიხედე".... იქ იყო ექიმი მიმაგრებული ადმინისტრაციის მიერ და მე ისიც არ ვიცოდი, რომ ის იყო უმცროსი ექიმი. როცა დამაწერინეს იქვე ის აქტი, თუ რაც იყო, ფორმა 100, მაშინ გავიგე, რომ ბექა ლიპარტელიანი იყო უმცროსი ექიმი. ჩვეულებრივად მუშაობდა რეანიმაციაში, კოვიდ პაციენტებს მკურნალობდა მშვენივრად, როგორც დანარჩენები. მე შემთხვევით გავედი, იმიტომ რომ პარკინგზე გავდიოდი და მივდიოდი კონფერენციაზე სხვა რეანიმატოლოგთან ერთად. მე რომ არ შევსულიყავი შემთხვევით, ჩემთვის არავის არ უთქვამს, ჩემი 30 წუთი მე დავამთავრე და გავედი" - თქვა ვიოლეტა ინასარიძემ დღეს გამართულ სასამართლო სხდომაზე და განმარტა, რომ იმ დროს, როცა მეგი ბაქრაძე მან ნახა, სხეულზე მას სიწითლეები არ ჰქონდა და თავს კარგად გრძნობდა.
პროკურორმა ექიმს ჰკითხა, თუკი ის შემთხვევით მოხვდა იმ დროს მეგი ბაქრაძესთან, რატომ არის სამედიცინო დოკუმენტაციაზე მისი ხელმოწერა, რაზეც ვიოლეტა ინასარიძემ თქვა, რომ მას ამ დოკუმენტებზე ხელი კოლეგებმა "ძალით მოაწერინეს."
„რა საჭირო იყო თქვენ მოგეწერათ ხელი და არა პირობითად ბექა ლიპარტელიანს, რომელიც ატარებდა მასთან გარკვეულ მანიპულაციებს, თქვენ რა საჭირო იყავით, თქვენი ხელმოწერა რა საჭირო იყო?" - იკითხა პროკურორმა.
„ჩემი ნება არ იყო, მე მართლა შოკში ვიყავი და ისეთ დღეში ვიყავი, რომ ჩემმა მენეჯერმა, მზია გაგოშვილმა და ადმინისტრაციის უფროსებმა, დავით მაისურაძემ და გიორგი ბარძიმაძემ მითხრეს, ნუ გეშინია, ჩვენც ვაწერთ ხელსო" - უთხრა სასამართლოს ვიოლეტა ინასარიძემ. მან დაადასტურა, რომ როცა დოკუმენტებზე ხელს აწერდა, არ იცოდა რა მკურნალობა ჩაუტარდა მეგი ბაქრაძეს და რა მედიკამენტები ჰქონდა მას მიღებული, თუმცა დაამატა, რომ "მერე მივიდა და გაიგო" ეს ინფორმაცია კოლეგებისგან.
ექთანი მეგი ბაქრაძე 2021 წლის 19 მარტს თბილისის საუნივერსიტეტო კლინიკაში გარდაიცვალა. იგი საქართველოში კოვიდ-19-ის საწინააღმდეგო ვაქცინაციის დაწყების მესამე დღეს, 18 მარტს ახალციხეში, კლინიკა "იმედში" აცრა კოლეგამ. ნემსის გაკეთებიდან რამდენიმე წუთში ახალგაზრდა ქალი ცუდად გახდა და მოგვიანებით გონება დაკარგა. რამდენიმე საათის შემდეგ რეანიმობილმა იგი თბილისში, პირველ საუნივერსიტეტო კლინიკაში გადაიყვანა.