2022 წლის 10 თვეში საქართველოდან უცხოეთში $661 მილიონის ღირებულების 64 ათასი ავტომობილი გავიდა, რაც წინა წელთან შედარებით 77%-ით მეტია. საქართველოდან ყველაზე მეტი - $245 მილიონის ღირებულების ავტომობილები აზერბაიჯანში გავიდა ექსპორტზე. მეორე ადგილს $117 მილიონით უკრაინა იკავებს, ხოლო მესამე პოზიციაზე სომხეთია, სადაც $84 მილიონის ღირებულების ავტომობილები გავიდა.

ავტო-იმპორტიორთა ასოციაციის ხელმძღვანელი ლაშა დარბაისელი „კომერსანტთან“ ამბობს, რომ რეექსპორტი წინა წლებთან შედარებით მნიშვნელოვნად არის გაზრდილი, მეორადი ავტომობილები კი გასული წლის ანალოგიურ პერიოდთან შედარებით დაახლოებით 20%-ითაა გაძვირებული.

„ავტომობილების ექსპორტი გაზრდილი არის ყაზახეთის, ყირგიზეთის და ტაჯიკეთის მიმართულებით, ამ ქვეყნებში რეალურად ხდებოდა რუსეთიდან ავტომობილების იმპორტი, სანქციების დაწესების შემდეგ, ისინი ვეღარ ახდენენ შუა აზიის ქვეყნებისთვის ავტომობილების მიწოდებას, ამიტომ საქართველო მნიშვნელოვანი ალტერნატივა გახდა. იმპორტის თვალსაზრისით უფრო ბიუჯეტური ავტომანქანებია მოთხოვნადი, რეექსპორტის მიმართულებით კი როგორც ბიუჯეტური, ისე ძვირადღირებული.

მეორადი ავტომობილების რეექსპორტი ბოლო პერიოდში მნიშვნელოვნად გაიზარდა, თითქმის გაორმაგებულია, ფასები კი დაახლოებით 20%-ით გაიზარდა. ყაზახეთის ბაზარზე რეექსპორტი წინა წლებთან შედარებით 3-ჯერ არის გაზრდილი, ტაჯიკეთში 1.5-ჯერ, ყირგიზეთში 2.5-ჯერ. უკრაინას მთლიან რეექსორტში დაახლოებით 15-20% ეჭირა, ომის გამო დღეს რეექსპორტში მისი წილი შემცირებულია.

მოთხოვნის ტიპი მნიშვნელოვნად არ იცვლება, რეექსპორტზე ძირითადად „ჰიუნდაისა“ და ,,ტოიოტას“ მარკის ავტომობილები გადის. ჰიბრიდულ ძრავზე მომუშავე ავტომობილებს ნაკლებად ითხოვენ ავტონაწილების და ავტოსერვისის ხელმიუწვდომლობის გამო. ჰიბრიდებზე მოთხოვნა უფრო მეტად სომხეთშია“, — აღნიშნა ლაშა დარბაისელმა.

სტატისტიკის მიხედვით, ექსპორტზე გასული ერთი ავტომობილის საშუალო ფასი 10 ათას დოლარს შეადგენდა. ექსპორტირებული ერთეული ავტომობილის საშუალო ფასი არაბთა გაერთიანებულ საამიროებშია, რაც 74 ათას დოლარს შეადგენს. ყველაზე დაბალი საშუალო ფასი კი ტაჯიკეთი რეექსპორტირებულ ავტომობილებს ჰქონდა, რაც საშუალოდ 5.7 ათას დოლარს შეადგენდა.