რა გამოწვევების წინაშე აღმოჩნდა „კოვიდ“ პანდემიის გამო საქართველოს მძიმე მრეწველობა, ანუ დარგი - რომელიც ქვეყანაში უცხოური ვალუტის შემოდინების ერთ-ერთი ძირითადი წყაროა. ამ საკითხზე „ჯორჯიან მანგანეზის“ დირექტორი მერაბ ლომინაძე საუბრობს. 

— პანდემიასთან დაკავშირებულ რეგულაციებს როგორ ართმევთ თავს, რამდენად ეფექტურია ისინი და გაგირთულდათ თუ არა საქმიანობა?

— პანდემიის პირობებში, მოგვიწია ახალ რეალობებთან თანაცხოვრება და ახალ გამოწვევებთან გამკლავება. ამაში მე ვგულისხმობ ყველა იმ მითითებასა და რეკომენდაციას, რომელიც ჩვენ მივიღეთ შესაბამისი სახელმწიფო ორგანოებიდან. შემიძლია ვთქვა, რომ ეს მითითებები ზედმიწევნით სრულდება. კომპანიის ხელმძღვანელობა თანამშრომლობს როგორც პერსონალთან, ასევე - პროფკავშირებთან და ეს თანამშრომლობა ორმხრივია. შედეგად მივიღეთ ის, რომ ჩვენს საწარმოში ინფიცირების არცერთი ფაქტი დაფიქსირებულა, არც ვირუსის პირველი ტალღის დროს და არც - ახლა. მე ვფიქრობ, რომ ეს ძალიან დიდი წარმატებაა და ეს ჩემ მიერ ნახსენები ნაყოფიერი თანამშრომლობის შედეგია. ვგულისხმობ სახელმწიფოს, კომპანიას, თანამშრომლებსა და პროფკავშირებს.

— პანდემიით გამოწვეული რეგულაციები და წესები როგორ აისახა თქვენი პროდუქციის თვითღირებულებაზე?

— რასაკვირველია, ნებისმიერი დამატებითი აქტივობა არის დამატებითი ხარჯი კომპანიისთვის. ფაქტია, რომ ეს ყველაფერი ტვირთად დააწვა თვითღირებულებას და მოხდა ჩვენი პროდუქციის თვითღირებულების ზრდა. თუმცა, მოხერხდა და ერთობლივი მოქმედებებით, შევძელით ის, რომ ჩამოვყალიბდით სამოქმედო გეგმაზე, რომელიც წლის ბოლომდე გვაქვს გაწერილი. თავს ვართმევთ იმას, რომ ჩვენი არცერთი თანამშრომელი უხელფასო შვებულებაში არ გაგვიშვია, არცერთ მათგანს დაკლებია ხელფასი, არ მომხდარა იმ ხელშეკრულებებისა და გადატვირთვების გადახედვა, რომელიც გაფორმებული გვაქვს.

— საერთაშორისო ბაზრებზე რა სიტუაციაა და თქვენ რა გამოწვევების წინაშე აღმოჩნდით?

— უდავოა, რომ პანდემიამ თავისი დაღი დაამჩნია საერთაშორისო ბაზარსაც. შემცირებულია მოთხოვნა ჩვენს პროდუქციაზე. ადრეც ვთქვი და ახლაც ვიმეორებ, რომ კლება იქნება, დაახლოებით, 20-25 პროცენტი. ვფიქრობ, რომ 25 პროცენტი იქნება ის მაქსიმალური ნიშნული, რომელიც სახეზე გვექნება. თუმცა, კლების ასეთი მაჩვენებლის მიუხედავად, ჩვენ მიერ გათვლილ ეკონომიკურ ტრენდში ვჯდებით. რასაკვირველია, სხვა გამოწვევებიც გვაქვს, როგორიცაა, მაგალითად, საერთაშორისო ბაზარზე არსებული ფასები. წლის დასაწყისში ფასების კლება ბაზრისათვის დამახასიათებელი ტენდეცია იყო. თუ შევადარებთ 2018 და 2019 წელს, ჩვენი პროდუქციის გასაყიდი ფასი შემცირებულია, თუმცა, ყველა ამ პრობლემას, ჯერჯერობით, თავს ვართმევთ.

— თქვენი პროდუქციის თვითღირებულებაში მნიშვნელოვანი ადგილი უკავია ელექტროენერგიასა და მის ფასს. ეს გარემოება როგორ აისახა „ჯორჯიან მანგანეზის“ საქმიანობაზე ?

— იმის გამო, რომ წელს შედარებით უნალექო წელი იყო საქართველოში, ელექტროენერგიის გამომუშავება შემცირდა. შესაბამისად, გაიზარდა ელექტროენერგიის ფასიც. როგორც ცნობილია, ელექტროენერგია ძალიან მნიშვნელოვანი კომპონენტია ჩვენს წარმოებაში. ჩვენი პროდუქციის თვითღირებულების 25 პროცენტი სწორედ ელექტროენერგიაზე მოდის. თუმცა, ყველა მომწოდებელსა და ტრეიდერთან ურთიერთობით მივაგენით იმ იაფ რესურსსა და ბალანსს, რომელიც გვაძლევს იმის საშუალებას, რომ არ ვიყოთ ზარალიანი ორგანიზაცია. შეიძლება, ჩვენ ვეღარ გავდივართ მოგების იმ მარჟაზე, რაც გვქონდა, მაგრამ დღეს ნამდვილად შეგვიძლია, ვთქვათ, რომ კომპანიის მდგრადობა ეჭვის ქვეშ არ დგას და არც ლიკვიდურობის პრობლემა გვაქვს.