თბილისის მერიამ წერეთლის გამზირის რეაბილიტაციაზე ტენდერი ხელახლა გამოაცხადა. სატენდერო დოკუმენტაციაში წერია, რომ დედაქალაქის მთავრობას გამზირის რეაბილიტაცია თავდაპირველ ტენდერთან შედარებით 10,270 მლნ ლარით გაუძვირდა. ახალი ტენდერის მიხედვით წერეთლის გამზირის პროექტირება - მშენებლობის სამუშაოები 3 ეტაპად ჩატარდება, შესაბამისად მთლიანი გამზირის რეაბილიტაციაზე 3 ტენდერია გამოცხადებული.
პირველი ტენდერი სამტრედიის ქუჩიდან დიდუბის ხიდამდე მონაკვეთს მოიცავს. შესყიდვის სავარაუდო ღირებულება კი 8 542 914 ლარია. მეორე მონაკვეთი გვეტაძის ქუჩიდან იწყება და სამტრედიის ქუჩამდე გრძელდება, სავარაუდო ღირებულება 13 021 525 ლარს შეადგენს. მესამე მონაკვეთის - ცაბაძის ქუჩიდან გვეტაძის ქუჩამდე სარეაბილიტაციო სამუშაოების პროექტირება-მშენებლობის სახელმწიფო შესყიდვის სავარაუდო ღირებულება კი 8 889 150 ლარია.
სამივე შემთხვევაში განაცხადების მიღება 4 თებერვალს დაიწყება და 9 თებერვალს დასრულდება. წერეთლის გამზირის რეაბილიტაცია მერიას 20 183 314 ლარის მაგივრად ჯამში 30 453 589 ლარი დაუჯდება.
ცნობისათვის, თბილისის მერიამ წერეთლის გამზირის რეაბილიტაციაზე სახელმწიფო შესყიდვა თავდაპირველად 2023 წლის იანვარს გამოაცხადა. თუმცა აღნიშნული ტენდერები არ შედგა.