1-ლი დეკემბრიდან, საქართველოში „მწვანე პასპორტები“ ამოქმედდა, თუმცა რესტორატორმა მერიკო გუბელაძემ თავის რესტორანში მსგავსი რეგულაცია სექტემბრიდან დაიწყო და, როგორც ჩვენთან საუბარში განაცხადა, ამ ქმედებამ მას სიმშვიდე მოუტანა და სექტემბრიდან მის რესტორანში ვირუსის არცერთი შემთხვევა ყოფილა.

- სექტემბრიდან სამივე რესტორანში - „შავი ლომი“, „ნინიას ბაღი“ და კაფე „ლეილა“ დავიწყეთ რეგულაცია და ყველა თანამშრომელი და სტუმარიც ვაქცინირებულია. ეს იმიტომ გავაკეთეთ, რომ ჩვენს თანამშრომლებში რამდენჯერმე იფეთქა ვირუსმა, ყველანი ძალიან დაძაბულები ვიყავით, რაც უნდა დაიცვა რეგულაციები, სამზარეულოში ხალხი ერთმანეთთან ახლოს, მჭიდროდ მუშაობს. ეს იყო ჩემთვის პირველი მიზეზი, რატომაც ვთქვი: მორჩა, ან აიცრებით პერსონალი ან წახვალთ სახლში და ასევე არავაქცინირებულ სტუმრებსაც არ მივიღებ-მეთქი.
სხვათა შორის, თავიდან ზოგიერთ თანამშრომელს არ უნდოდა აცრა, მაგრამ ძალიან მარტივი, მოკლეხნიანი საუბარი საკმარისი გახდა, რომ აცრილიყვნენ. ხელები არავისთვის გადაგვიგრეხია და ძალით არ მიგვიყვანია იქ. მაშინ მივხვდი, რომ ხალხს არ ჰქონდა ინფორმაცია, ცოტა გაურკვევლობაში იყო ყველა, არ იცოდნენ, რა იყო ეს ვაქცინა. ავუხსენით, ვაჩვენეთ უცხოური წყაროები, გადავუთარგმნეთ. ავუხსენი, რა შედეგი მოაქვს, მაგალითიც ვუთხარი, რომ მე ავიცერი და შვილიც ავცერი... დამეთანხმა ეს ხალხი და აიცრა. მარტო ორი ადამიანი წავიდა სამსახურიდან. სხვათა შორის, ამის შემდეგ სტაფში ვირუსის არცერთი შემთხვევა ყოფილა. მანამდე, ამ ორი წლის მანძილზე, ძალიან დაძაბულები ვმუშაობდით და ახლა წყნარად ვართ. ფაქტობრივად, ეს მე ჩვენი სიმშვიდისთვის გავაკეთე.

- პირველად როგორ აუხსენით საზოგადოებას, რომ თქვენს რესტორანში მხოლოდ ვაქცინირებულ ადამიანებს უშვებდით?

- პირველად ამ სიახლის შესახებ სოციალურ ქსელში დავწერეთ, მერე მედიამ გააშუქა და ინფორმაცია სწრაფად გავრცელდა. ასე რომ, ყველა მომსვლელმა უკვე იცოდა სიახლის შესახებ და ვინც არ იცოდა, რაღაც ნაწილი უკან გავაბრუნეთ, ძირითადად - ტურისტები. ეს მომსვლელი სტუმრის დაახლოებით 10 პროცენტი იყო.

- მაშინ ჯერ კიდევ ოფიციალურად არ მოქმედებდა „მწვანე პასპორტები“, როგორ ხდებოდა ინფორმაციის გადამოწმება?

- მაშინაც არსებობდა აპლიკაცია, და თუ თავად არ ჰქონდათ ჩამოტვირთული შტრიხკოდი და ფოტო - გადაღებული, ჩვენ თვითონ შეგვყავდა მათი პირადი ნომერი და შტრიხკოდს ვნახულობდით, ვინც ვაქცინირებული არ იყო, PCR- ტესტის პასუხით შემოდიოდა.

- 1-ლი დეკემბრიდან „მწვანე პასპორტების“ ამოქმედებას ხალხის უკმაყოფილება მოჰყვა, ამის შესახებ ბევრი იწერება სოციალურ ქსელშიც...

- ჩვენც გვიწოდებდნენ ფაშისტებს, დისკრიმინაციაში გვდებდნენ ბრალს და ა.შ., მაგრამ ჩემთვის ძალიან მარტივად არის საქმე, ეს არ არის ადამიანის თავისუფლება, მთელი მსოფლიო 2 წელია საგანგებო მდგომარეობაშია, ხალხი იხოცება, ეკონომიკურ წუმპეში ვართ და ყველა უნდა ვცდილობდეთ, რომ ეს დავამთავროთ, მე მჯერა და ვუსმენ მსოფლიოს მეცნიერებს და ექიმებს, საერთოდ, მეცინება იმაზე, რომ ეს ადამიანის უფლების წართმევა და დარღვევაა, ეს თუ ასეა, მაშინ ელაპარაკეთ იმ შვილებს, ვისაც დედები და ოჯახის წევრები დაეხოცათ, არ იცრება ეს ხალხი და ამის გამო არ დასრულდა პანდემია.

ვიცით, რომ აცრა აჩერებს გადადებასაც და სიკვდილსაც, ვიცით, რომ ეს აცრა ერთადერთი გზაა პანდემიის დასასრულებლად. ამას გვიმტკიცებენ მსოფლიოს მეცნიერები და ექიმები, ანტივაქსერები კი გვეუბნებიან, რომ ბილ გეითსმა დაიწყო ეს ყველაფერი... ჩემთვის ძალიან ნათლადაა საქმე და ვისაც არ სჯერა, დაჯდეს სახლში.

- „მწვანე პასპორტის“ მოწინააღმდეგეები ამბობენ, რომ ვაქცინირებულსაც შეიძლება დაემართოს ვირუსი და ისიც გადამდებია...

- გასაგებია, მაგრამ ხომ აქვს მნიშვნელობა, რამდენად გადამდებია, არავაქცინირებულს ეს ვირუსი ძალიან მძიმე ფორმით ხვდება და ბევრად უფრო გადამდებია, ვიდრე ვაქცინირებული. კი, მასაც ხვდება ვირუსი, ოღონდ შედარებით იოლი ფორმით და ბევრად ნაკლები შანსია, სხვას გადასდოს, და თუ ამას გაიგებს საზოგადოების ის ნაწილი, რომელიც არ იცრება, რაღაცნაირად დავასრულებთ პანდემიას, თუ არადა, მომდევნო 3 წელი კიდევ ამ დღეში ვიქნებით, ან როდესმე თავისით დასრულდება ყველაფერი...

21-ე საუკუნეა და მეცნიერება იმ დონეზეა განვითარებული, რომ 9 თვეში მოგვაწოდეს ვაქცინა, ამაზე დიდი უპირატესობა რა უნდა იყოს?, ამიტომ ავიცრათ, დავიცვათ ერთმანეთი და ჩვენთვის საყვარელი ადამიანები, ნუ იფიქრებთ გლობალურ ეკონომიკაზე, საკუთარი ოჯახის წევრებზე იფიქრეთ და მათთვის მაინც აიცერით. ნომერი პირველი სიცოცხლეა და მერე დანარჩენი ყველაფერი.

NS