„მერსედესი“ გახდა მესამე მსხვილი ავტომობილების მწარმოებელი კომპანია, რომელმაც რუსეთი დატოვა. მოსკოვის რეგიონში ქარხანა და ქონება, კონცერნმა ადგილობრივ „ავტოდომს“ მიჰყიდა, სადაც სავარაუდოდ, ჩინური მანქანების წარმოება დაიწყება. „მერსედესმა“ თავისი აქტივები 2 მილიარდ ევროდ შეაფასა, მაგრამ ანალიტიკოსები ვარაუდობენ, რომ არსებულ სიტუაციაში ქარხნის რუბლით გაყიდვის პრაქტიკაც შესაძლებელია.
ოფიციალურ განცხადებას ავტოკონცერნი 26 ოქტომბერს გააკეთებს, შედეგად, გერმანული პრემიუმ კონცერნი რუსეთის ბაზარს დატოვებს.
„მერსედესი“ არის მესამე მწარმოებელი სამგზავრო მანქანების ინდუსტრიაში, რომელმაც რუსული ბაზარი დატოვა. მანამდე მსგავს ქმდებას „რენომ“ და „ნისანმა“ მიმართეს.
„მერსედეს-ბენცის“ ქარხანაში, რომელიც რუსეთში 2019 წლიდან ფუნქციონირებს, წელიწადში დაახლოებით 25 000 მანქანა იწარმოებოდა. პროექტის ინვესტიცია 19 მილიარდ რუბლს შეადგენდა.
გასულ წელს Mercedes-Benz-ის კონცერნმა რუსეთში გაყიდვები 11%-ით 43 000 მანქანამდე გაზარდა. მიმდინარე წლის ცხრა თვის შედეგებით კი ის 73%-ით 9,1 ათას ერთეულამდე შემცირდა.
კომპანია „ავტოდომი“ პრემიუმ კლასისა და ძვირად ღირებული მანქანების გაყიდვასა და მოვლაზეა სპეციალიზებული. ის ანდრეი ოლხოვსკის ეკუთვნის, რომელიც ამავდროულად გენერალური დირექტორის პოსტსაც იკავებს.