მესტიაში 10 მილიონი ლარის ინვესტიციით სამი ახალი სასტუმრო იხსნება. სასტუმრო „გისტოლა“ - პრემიუმ კლასის 4 ვარსკვლავიანი სასტუმრო იქნება, მეორე ესაა „ლაჰილი“ - ბუტიკური, ლოფტის სტილის სასტუმრო 25 ნომრით და მესამე სასტუმრო მესტიის ცენტრში ცენტრში - „მესტია ინნ“-ი. როგორც ტურისტული კომპანია ,,იბერია ტურს პლიუსის დამფუძნებელი, ჰოტელიერი მაია მურაჩაშვილი „კომერსანტთან“ განმარტავს, ახალი სასტუმროები იქნება როგორც პრემიუმ კლასის, ასევე ბუტიკური სტილის.

„აპრილის ბოლოს, პირველი მაისისთვის სამივე სასტუმრო მზად იქნება და გაიხსნება.  სამივე სასტუმრო ჯამში 100 ახალი ოთახითაა  წარმოდგენილი, არის როგორც პრემიუმ, ასევე ორი ბუტიკის ტიპის სასტუმროები. ყოველთვის რთული იყო მესტიაში კარგი განთავსების საშუალების პოვნა, სასტუმროები ბევრია, საოჯახო სასტუმროები -  უფრო მეტი. მაგრამ კარგად დალაგებული სერვისი თავისი რესტორნით მომსახურე პერსონალითა და კლასიფიცირებული ვარკვლავებით, რომელიც სრულად მიყვებიან ამ ევროპულ სტანდარტებს, ასეთი ჯერ არ არის. მთიან რეგიონში ასეთი სასტუმროები იშვიათია, თუმცა საჭირო.

მესტიას როგორც წესი,  ყოველთვის ჰყავს როგორც ქართველი ასევე უცხოელი მომხმარებელი. მესტია თავისი ისტორიული და კულტურული მნიშვნელობით ძალიან დიდ ინტერესს იწვევს. მოლოდინები ისეთი ვერ გვექნება როგორიც 2019 წელს შეიძლებოდა გვქონოდა, მაგრამ ამინდი გვაქვს. როგორც კი გაჟღერდა,  რომ ახალი სასტუმროები იხსნება, მაშინვე დამირეკეს ტურისტულმა კომპანიებმა და უკვე ითხოვენ ადგილბს, მათ შორის უცხოელი პარტნიორებიც. ქართველი მომხმარებლისგანაც ძალიან დიდი აქტიურობა წამოვიდა,“- განმარტავს სასტუმროების მმართველი მაია მურაჩაშვილი.

ახალი სასტუმროები მესტიაში აპრილის ბოლოს, მაისის დასაწყისიდან სტუმრების მიღებას უკვე დაიწყებენ. როგორც სასტუმრობის მმართველმა მაია მურაჩაშვილმა აღნიშნა, სამივე სასტუმრო სრულად ქართული ინვესტიციით, მესტიის მაცხოვრებლების თანხებით შენდება.

მარიამ მორგოშია