მესტიის მუნიციპალიტეტის მერია საახალწლოდ გენერატორს ყიდულობს. აღნიშნული გენერატორის შესყიდვას მერია საახალწლო განათებების უწყვეტ რეჟიმში ფუნქციონირებისათვის ახდენს.

გენერატორის შეძენას მერია გამარტივებული შესყიდვით გეგმავს. როგორც მესტიის მერის კაპიტონ ჟორჟოლიანის წერილშია აღნიშნული, 31 დეკემბერს მესტიის მუნიციპალიტეტის მერიაში დაგეგმილია საახალწლო ღონისძიება, რომლის ორგანიზებისთვის საჭირო თანხა შეადგენს 150 000 ლარს, აქედან 105 000 ლარი განსაზღვრულია გენერატორის შესასყიდად, რომლის შესყიდვისათვის გამოცხადებული ტენდერი (NAT220026359) არ შედგა.

ამ ეტაპზე გენერატორი გამოიყენება საახალწლო მოწყობილობების გასანათებლად, ხოლო შემდგომ გამოიყენება მერიის საჭიროებისათვის.

დარჩენილი 45 000 ლარით დაგეგმილია შშმ პირებისათვის, დედ-მამით ობოლთათვის და ბავშვებისათვის სასაჩუქრე შეფუთვების შესყიდვა, ასევე საახალწლო კონცერტი, ქუჩის განათებები და სხვადასხვა აქტივობები.

უფრო კონკრეტული, აღნიშნული 45 000 ხარჯთაღრიცხვა ასეთია:

საბავშვო საჩუქრები - 12000 ლარი
ნაძვის ხის გაფორმება - 1400 ლარი
გლინტვეინი - 1500 ლარი
ფოიერვერკი - 2000 ლარი
მუსიკალური გაფორმება (მოწვეული ბენდი ) - 9000 ლარი
სცენის შეფუთვა - 6500 ლარი
ელექტრო კაბელი - 3200 ლარი
მავთული - 400 ლარი
ქუჩის განათება - 9000 ლარი.

საახალწლო ღონისძიებები მესტიაში იწყება 2022 წლის 24 დეკემბერს და დასრულდება 2023 წლის 14 იანვარს.

საახალწლო განათებების უწყვეტ რეჟიმში ფუნქციონირებისათვის გენერატორის შეძენა გულისხმობს იმას, რომ სვანეთში ზამთრის სეზონზე ელექტროენერგიის არასტაბილური მოწოდების მოლოდინი აქვთ. 

მესტია ელექტროენერგიის მოხმარების თვალსაზრისით წლიდან წლამდე რეკორდებს ხსნის. ადგილობრივები შეღავათით სარგებლობენ და ელექტროენერგიის საფასურს არ იხდიან. რეგიონში ხშირია ციფრული ფულის, კრიპტოვალუტების გამომუშავება, ეს კი რეგიონს ელექტრომომარაგების კუთხით პრობლემებს უკვე დიდი ხანია უქმნის.

ცნობისთვის, მიმდინარე წლის 9 თვეში მესტიაში ელექტროენერგიის მოხმარება 70 მლნ 777 ათას კვტ.სთ აღემატებოდა, რაც „ენერგო პრო ჯორჯიას“ მონაცემებით, წინა წელთან შედარებით, 24%-ით არის გაზრდილი.