ეროვნული ბანკის შეფასებით, მიგრანტების მხრიდან გაზრდილი მოთხოვნა უძრავი ქონების სექტორის გარდა, ფასების ზრდას ტურიზმის დარგშიც იწვევს.
როგორც „ბიზნეს ფორმულას“ კითხვის საპასუხოდ ეროვნული ბანკის ვიცე-პრეზიდენტმა, არჩილ მესტვირიშვილმა განაცხადა, ბოლო პერიოდში გაზრდილი მოთხოვნა, მათ შორის მიგრანტების მხრიდან, როგორც ქირის, ასევე კვების ობიექტების მიმართულებით ფასებზე დამატებითი ზეწოლაა.
„ინფლაცია ძირითადად კვლავ საგარეო ფაქტორებითაა გამოწვეული. თუმცა ბოლო პერიოდში ჩვენ გაზრდილი მოთხოვნიდან მომდინარე ზეწოლასაც ვხედავთ, რის გამოც გამკაცრებული მონეტარული პოლიტიკა გვაქვს. ერთ-ერთი ასეთი განმაპირობებელი ფაქტორი მიგრანტების გაზრდილი რაოდენობაა, რომელიც უძრავ ქონებაზე ფასებს ზრდის. ძირითადად ფასების ზრდა იქ ფიქსირდება, სადაც მიწოდებას გარკვეულწილად შეზღუდვა გააჩნია. საქართველოშიც ბოლო პერიოდში ტურიზმის სექტორს აღდგენის დინამიკა აქვს, რასაც ემატება მიგრანტების ეფექტი და ჩვენ ვხედავთ, რომ მომსახურების და ტურიზმის სფეროში, მათ შორის რესტორნების და ქირის მიმართულებით ფასების მატება ფიქსირდება. ეს კი როგორც აღინიშნა, მოთხოვნის დროებითი ზრდითა გამოწვეული“, - განაცხადა არჩილ მესტვირიშვილმა.
ცნობისთვის, ეროვნული ბანკის პრეზიდენტის განცხადებით, საქართველოში ინფლაცია კლებას 2023 წლის თებერვლიდან დაიწყებს. კობა გვენეტაძის თქმით, მოლოდინია, რომ იანვრის ჩათვლით ინფლაცია არსებულ დონეზე, ანუ ორნიშნა შენარჩუნდება.
საქსტატის მონაცემებით, 2022 წლის სექტემბერში წლიური ინფლაცია 11.5%-მდე გაიზარდა. უკვე ერთ წელზე მეტია საქართველოში ორნიშნა ინფლაცია ფიქსირდება, რომელიც მნიშვნელოვნად აღემატება ეროვნული ბანკის მიზნობრივ 3%-იან მაჩვენებელს.