ყველაფერი უნდა გავაკეთოთ იმისთვის, რომ კიდევ ერთხელ დავარწმუნოთ ჩვენი მოსახლეობა ავიცრათ, - ამის შესახებ პრემიერ-მინისტრმა ირაკლი ღარიბაშვილმა ჟურნალისტებს ბაღდათში განუცხადა.
ირაკლი ღარიბაშვილის თქმით, როგორც პრემიერ-მინისტრმა ყველაფერი გააკეთა იმისთვის, რომ დროულად შემოეტანა ვაქცინები.
„დავინიშნე რა, პირადად მე ვიყავი ჩართული და შემოვიტანეთ მილიონობით ვაქცინა. შემოვიტანეთ ყველანაირი ვაქცინა „ფაიზერი“, „სინოფარმი“ „სინოვაკი“. ახლაც დავამატეთ, პირველ ოქტომბერს შემოვიტანეთ ვაქცინები, „სინოფარმი“. მე პირადად ვიყავი ჩართული ამ კამპანიაშიც, ვაქცინაციის პროცესშიც მთავრობის წევრებთან ერთად. პირადად მივეცი მაგალითი, როცა კოვიდგადატანილმა ავიცერი ორჯერ „ფაიზერით“. ჩემი ოჯახის ყველა წევრი აცრილია.
ჩვენ გვქონდა ძალიან აგრესიული ვაქცინაციის კამპანია. შევძელით ორი მილიონი აცრის გაკეთება, ანუ მილიონი ადამიანი ავცერით. ეს არის ის, რაც შევძელით და დავარწმუნეთ მოსახლეობა, რომ ეს არის აუცილებელი. ახლა, პროცესი გრძელდება. რომ იცოდეთ, ეს არ ხდება მხოლოდ ჩვენთან. ევროპის ქვეყნებში, მათ შორის, ამერიკაშიც არიან ანიტივაქსერები, რომლებსაც უბრალოდ არ სჯერათ ვაქცინის ეფექტიანობის. ამ დროს, ჩვენ ვიცით, რომ ეს არის მცდარი აზრი. კიდევ უფრო მეტი უნდა გავაკეთოთ ყველამ ერთად მათ შორის, ოპოზიციამაც. რა თქმა უნდა, ნორმალურ ოპოზიციას ვგულისხმობ, იმიტომ, რომ ჩვენ მოლოდინი არ გვაქვს, რომ დესტრუქციული ძალები ამ პროცესში ჩაერთვებიან, ყველაფერი უნდა გავაკეთოთ იმისთვის, რომ კიდევ ერთხელ დავარწმუნოთ ჩვენი მოსახლეობა, ავიცრათ, დავიცვათ ჩვენი ჯანმრთელობა და სიცოცხლე“, - განაცხადა ირაკლი ღრიბაშვილმა.