ქართულმა კომპანიამ “მეტალ ქონსთრაქშენ ჯორჯიამ” ყაზახეთში ფეროშენადნობების ქარხანა ააშენა. ფინანსური ანგარიშგების მიხედვით, კომპანიამ 2021 წელს 180 მილიონი ლარის შემოსავალი და 67.2 მილიონი ლარის წმინდა მოგება მიიღო.
„კომპანიის ძირითადი ბიზნეს საქმიანობა შედგება სამი მთავარი მიმართულებისგან: სხვადასხვა სახის ლითონის ნაწარმისა და კონსტრუქციების დემონტაჟი და რეალიზაცია; საწარმოო ობიექტების მშენებლობა და აწყობა და ფეროშენადნობთა პროდუქტების წარმოება და რეალიზაცია. 2021 წლიდან კომპანიამ დაიწყო ფართომასშტაბიანი პროექტი ყაზახეთში, სადაც ააშენა და ექსპლუატაციაში გაუშვა აგლომერაციის ქარხანა და ფეროშენადნობთა ქარხანა. 2022 წელს კომპანიამ შეიძინა ფეროშენადნობთა ქარხანა თბილისში, ორხევის რაიონში და დაიწყო მანგანუმის ფეროშენადნობი პროდუქციის წარმოება და რეალიზაცია. 2021 წლის განმავლობაში კომპანია ოპერირებდა საქართველოში და ყაზახეთში“, — აღნიშნავენ კომპანიაში.
2021-2022 წლებში კომპანიამ განახორციელა ორი ფართომასშტაბიანი პროექტი ყაზახეთში, მან ააშენა და ექსპლუატაციაში გაუშვა აგლომერაციის და ფეროშენადნობის ქარხნები ASIA FERROALLOYS-თან (ყოფილი Qaz Carbon LLP) გაფორმებული ხელშეკრულების შესაბამისად. ბოლო ანგარიშგების მიხედვით, ყაზახეთში მიღებული შემოსავალი შეადგენს 180,058 ათას ლარს, რაც მოიცავს შემოსავალს ქარხნების მშენებლობიდან 178,105 ათასი ლარის და საქონლის გაყიდვიდან 1,100 ათასი ლარის ოდენობით.
კომპანიის 100%-იანი მფლობელია Zeus Property Holdings Ltd - კომპანია, რომელიც დაფუძნებულია სეიშელის რესპუბლიკაში. Zeus Property Holdings Ltd-ს საბოლოოდ აკონტროლებდა სამხრეთ აფრიკის მოქალაქე, მონიკა პამელა ვან ზილ (Monica Pamela Van Zyl) 2021 წლის 1 თებერვლამდე. 2021 წლის 1 თებერვლიდან კომპანიას საბოლოოდ აკონტროლებს შარლოტ დოროთი ვან ჰეერდენი (Charlotte Dorothy Van Heerden), სამხრეთ აფრიკის მოქალაქე.