PMCG კვლევითი ცენტრის კვლევითმა ასისტენტმა შოთა მაჭარაშვილმა რადიო „კომერსანტის“ ეთერში დასაქმების ბაზრის კვლევის შესახებ ისაუბრა, რომელიც PMCG-იმ jobs.ge-თან თანამშრომლობით მოამზადა.
მისი თქმით, ყველაზე მოთხოვნადი პოზიციები, jobs.ge-ის მიხედვით, არის: კონსულტანტი, გაყიდვების მენეჯერი, მოლარე, მიმტანი, გაყიდვების კონსულტანტი, მძღოლი და დამლაგებელი. რაც იმას ნიშნავს, რომ დაბალკვალიფიციურ კადრებზე მეტი მოთხოვნაა.
შოთა მაჭარაშვილ ამის მიზეზად კადრების მომიჯნავე სექტორებში გადინებას და სამუშაო ძალის მიგრაციას ასახელებს.
კვლევის მიხედვით, 2022 წლის IV კვარტალში და, თუნდაც, 2023 წლის თებერვალში გაიზარდა ადამიანთა რაოდენობა, რომლებიც იღებდნენ თვიურ ხელფასს, გაიზარდა ადამიანთა საშუალო თვიური ანაზღაურება და გაზრდილია მაღალი ხელფასის მიმღებთა წილი.
„2022 წლის ბოლო კვარტალში, იმ ადამიანთა რაოდენობა, რომლებიც იღებდნენ ხელფასს 929 000 ადამიანი იყო, რაც წინა წლის ანალოგიურ პერიოდთან შედარებით 1%-ით, 9000 ადამიანით, მაღალი მაჩვენებელია;
2023 წლის თებერვალში ადამიანთა რაოდენობა, რომლებიც იღებდნენ ხელფასს, წინა წლის მონაცემებთან შედარებით 5%-თაა გაზრდილი;
2023 წლის თებერვალში იმ ადამიანთა რაოდენობა, ვინც 2023 წლის თებერვალში იღებდა 0-დან 600 ლარამდე ხელფასს, 19.2%-ით გაიზარდა, რაც წინა წლის მაჩვენებელთან შედარებით 54 პროცენტული პუნქტით ნაკლებია;
გაზრდილია იმ ადამიანთა რაოდენობა, რომლებიც იღებდნენ 2400 ლარს და მეტს. ისინი დასაქმებულთა 20%-ს შეადგენენ და წინა წლის მონაცემთან შედარებით 8 პროცენტული პუნქტით გაზრდილი მაჩვენებელია.
რომ შევადაროთ 2022 წლის მეოთხე კვარტალი პანდემიამდელ პერიოდს - 2019 წლის მეოთხე კვარტალს, უმუშევრობის მაჩვენებელი უმნიშვნელოდაა შეცვლილი, თითქმის იგივეა, რაც შეეხება ვაკანსიების გამოცხადების დონეს, ორჯერაა გაზრდილი.
2022 წლის სექტემბრიდან 2023 წლის თებერვლის ჩათვლით, ბოლო 6 თვეში, jobs.ge-ზე გამოქვეყნდა 36 565 ვაკანსია, რაც 2021-22 წლის შესაბამის პერიოდთან შედარებით 20%-ით გაზრდილი მაჩვენებელია. წინა თვეში გამოქვეყნდა 6170 ვაკანსია, რაც წინა თვესთან შედარებით 1.5%-ით ნაკლები იყო“, - განაცხადა შოთა მაჭარაშვილმა.