თბილისის მერია ვარკეთილის მეტროს რეკონსტრუქციასა და კაპიტალურ რემონტში 13,398,611 ლარს დახარჯავს - ამის შესახებ ინფორმაციას ფლანგვის დეტექტორი ავრცელებს, მათი ცნობით თბილისის მერიამ შერჩეულ კომპანიასთან 2022 წლის დეკემბერში ხელშეკრულება გამარტივებული წესით გააფორმა.
მერიამ ვარკეთილის რეკონსტრუქცია-რემონტისთვის ტენდერი მხოლოდ 2022 წელს გამოაცხადა. ტენდერში გამარჯვებულ კომპანია მამისონთან მერიამ ხელშეკრულება გაფორმებიდან 6 თვეში გაწყვიტა. მეორე ხელშეკრულება მერიამ უკვე უტენდეროდ, გამარტივებული წესით შპს ბადა ქონსთრაქშენს გაუფორმა. ხელშეკრულების ღირებულება დაახლოებით 13.4 მილიონი ლარია, ხოლო კომპანიის დამფუძნებელი ქართული ოცნების დამფინანსებელია.
2022 წლამდე ბადა ქონსთრაქშენს სახელმწიფო ორგანოსთან მაქსიმუმ 2,245-ლარიანი ხელშეკრულება ჰქონია გაფორმებული. ხელშეკრულების მიხედვით, შპს ბადა ქონსთრაქშენმა მეტროს რეკონსტრუქცია-რემონტი 18 თვეში უნდა დაასრულოს.
შპს ბადა კონსთრაქშენი 2011 წელს დაფუძნებული კომპანიაა. ვებ-გვერდის მიხედვით კომპანიას 3 დასრულებული და 3 მიმდინარე პროექტი აქვს. დასრულებულ პროექტებს განეკუთვნება ბიზნეს ცენტრი ატრიუმი, სასტუმრო ნიშნიანიძეზე და ბოლნისის მუზეუმი. ხოლო მიმდინარე პროექტებია ერთი ინდივიდუალური პროექტი, საცხოვრებელი კომპლექსი ვილა კავკასიონი და 11 სართულიანი საცხოვრებელი სახლი ბადა გლდანი.
შპს ბადა კონსთრაქშენისთვის ეს სახელმწიფო შესყიდვებში მონაწილეობის პირველი შემთხვევა არ არის. კომპანია ტენდერებში არა, თუმცა გამარტივებულ შესყიდვებში 2012 წლიდან ფიქსირდება. უნდა აღინიშნოს, რომ 2012-2021 წლებში სახელმწიფოს სხვადასხვა ორგანოებმა კომპანიასთან მხოლოდ 18 ხელშეკრულება გააფორმეს. მათგან ყველაზე მაღალი ღირებულების შესყიდვა, 2014 წელს საქ.სასჯელაღსრულების, პრობაციისა და იურიდიულ დახმარების საკითხთა სამინისტროსთან გაფორმებული ხელშეკრულებაა, რომლის ღირებულებაც 2,245 ლარი იყო, ხოლო ყველაზე დაბალი ღირებულების ხელშეკრულება შავსაყდრის საჯარო სკოლამ გაუფორმა და ხელშეკრულების ღირებულება 20 ლარი და 68 თეთრი იყო.
აღსანიშნავია, რომ კომპანიის დამფუძნებელმა და 100%-ის მესაკუთრე ბაჩანა შენგელიამ ქართულ ოცნებას 2014 წელს 60,000 ლარი შესწირა.