„მეწარმეთა კავშირის“ განცხადებით, პარლამენტმა სამეწარმეო სფეროს კანონი ისე დაუწესა, რომ მათ უმრავლესობასთან კომუნიკაცი არ ჰქონია. მეწარმეები საქმის კურსში არ იყვნენ, რის გამოც რეკომენდაციების დიდი ნაწილი, რომელიც ამ სფეროს წარმომადგენლებს კანონმდებლობის მიმართ გააჩნიათ, ბუნებრივია, ვერ გაითვალისწინებდნენ. ამის შესახებ „კომერსანტს“ მეწარმეთა კავშირის ხელმძღვანელმა გოგა ციცქიშვილმა უთხრა.

„ჩვენ არათუ კომუნიკაციის შესაძლებლობა არ მოგვეცა, ელემენტარულად, ინფორმირებულიც არ ვიყავით. კანონი ისე მიიღეს, რომ მეწარმეების უმეტესობამ ამის შესახებ არაფერი იცის. ცხადია, ყველას სათითაოდ ვერ დაუკავშირდებიან, მაგრამ არც ასეთი იგნორირება  შეიძლება. მსხვილ ბიზნესთან მიმართებაშიც კი ასეთი პრობლემაა და მით უმეტეს ჩვენ, მცირე ბიზნესს, ქვეყანაში ანგარიშს არავინ გვიწევს, როცა სექტორი ეკონომიკის წამყვან ძალად უნდა იყოს მიჩნეული.  არის ერთი ძალიან ვიწრო წრე, ვისთანაც ხელისუფლებას გარკვეული კავშირი აქვს და გრძელდება ასე უსასრულოდ, ნაცნობ წრეზე ტრიალებენ. ასე ქვეყანა წინ ვერ წავა“, - აცხადებს ციცქიშვილი.

რაც შეეხება შენიშვნებს, კავშირის ხელმძღვანელის შეფასებით, მეტი სიცხადეა საჭირო ფინანსური დოკუმენტების გამჭვირვალობასთან დაკავშირებით, ასევე შპს-ებთან მიმართებაშიც.

„კანონი გვეუბნება, რომ ფინანსური დოკუმენტები უნდა იყოს გამჭვირვალე, რომელზეც მესამე პირსაც ექნება წვდომა. არ ვიცი, ტექნიკურად როგორ უნდა გადაწყდეს ეს საკითხი, ან მესამე პირს რა შესაძლებლობა ექნება იმისთვის, რომ დოკუმენტებს გაეცნოს?! თუკი მეწარმე ვარ და ჩემთვის საჭირო ნედლეულს შევიძენ დაბალ ფასში, არანაირი სურვილი არ მექნება, ეს ინფორმაცია იყოს გამჭვირვალე. ამან, ზოგ შემთხვევაში, შეიძლება მეწარმე დააზარალოს. უცნობია ისიც, როგორ დაარეგულირებენ ვალებთან დაკავშირებულ საკითხს, რა მხრივაც მცირე და საშუალო მეწარმეებს ხშირად სადისტრიბუციო კომპანიებთან აქვთ პრობლემა. ამ ეტაპზეც, მეფუტკრეების მიმართ 50 000-ლარიანი დავალიანება აქვთ სადისტრიბუციო კომპანიებს, მაგრამ დღეს 1 ლარიც არ არის გადახდილი. ამ დროს ფირმას შეუძლია თავი გამოაცხადოს გაკოტრებულად და სასამართლოში თუ წარადგენენ შესაბამის დოკუმენტს, შეიძლება არც დაეკისროს გადახდა ან ნაწილობრივი გადახდა დაავალდებულონ, როგორც „გუდვილის“ შემთხვევაში მოხდა - ყველის მწარმოებლების რამდენიმე ათასიანი ვალი აქვს ჰიპერმარკეტს დაგროვილი, რასაც 50 ლარობით უხდის მეწარმეებს, წლობით გრძელდება ამ ვალის გადახდა. ამასობაში კი შეიძლება საერთოდ გაკოტრდნენ ეს კომპანიები“, - აცხადებს გოგა ციცქიშვილი ,,კომერსანტთან“ საუბარში.

რაც შეეხება კანონპროექტის დადებით მხარეს, ციცქიშვილის თქმით,  რამდენიმე მიმართულებით უფრო დაიხვეწა, ვიდრე მანამდე იყო. მაგალითისთვის, შპს-ს დირექტორის პასუხისმგებლობასთან დაკავშირებით.

,,გვაქვს შემთხვევები, როცა კომპანიის დამფუძნებლებს ბრალეულობა არ მიუძღვით, მაგრამ თუკი დირექტორმა არაკეთილსინდისიერი ქმედებებით უშუალოდ შპს დააზარალა, პასუხისმგებლობა მას დაეკისრება. არის ასევე რამდენიმე პუნქტი , რომელიც ძველ კანონში ორაზროვნად იკითხებოდა და გარკვეულ სუბიექტებს ლავირების საშუალებას აძლევდა, ესეც ახალი კანონმდებლობით დიდწილად მოგვარდა, უფრო ზუსტად  განისაზღვრა მხარეთა მოვალეობები, რაც ახალ კანონმდებლობის დადებით მხარედ უნდა ჩაითვალოს", - დასძენს ციცქიშვილი.  

შეგახსენებთ, რომ პარლამენტმა მესამე მოსმენით განიხილა და კანონპროექტს „მეწარმეთა შესახებ“ 79 ხმით მხარი დაუჭირა.

კანონპროექტის თანმდევი პაკეტი 26 კანონპროეტისაგან შედგება და შესაბამისად, მიღებული კანონპროექტით წესრიგდება სამეწარმეო საზოგადოების დაფუძნებასთან, ერთი პირის სამეწარმეო საზოგადოებასთან, შენატანებთან, სამეწარმეო საზოგადოების ორგანოებთან, ბუღალტრულ აღრიცხვასთან, ანგარიშგებასთან და აუდიტთან, ხანდაზმულობასა და გასაჩივრების ვადებთან დაკავშირებული საკითხები.

შეგახსენებთ, რომ საქართველოს მეწარმეთა კავშირი 2018 წელს დაფუძნდა. ეს არის არაკომერციული, არასამეწარმეო პირი, რომელიც საქართველოში 500-ზე მეტ მეწარმე სუბიექტს აერთიანებს - იმ მცირე და საშუალო მეწარმეებს, რომლებიც თავიანთ პროდუქციას უშუალოდ საქართველოში აწარმოებენ.

კომპანია ეხმარება მეწარმეებს სხვადასხვა პრობლემის მოგვარებაში, მათ შორის, როგორ იმუშაონ ბრენდირების და მარკეტინგის კუთხით, იგივე სოციალურ მედიაში, რაც მათ პროდუქციის შექმნასა და  რეალიზებას, ასევე ცნობადობის ამაღლებას სჭირდება.

მარი ჩიტაია