Microsoft-ის კვარტალურმა შემოსავალმა მოლოდინი არ გამართლა. მეორე კვარტალში Microsoft Corporation-მა 2%-ით გაზარდა შემოსავალი მაგრამ, სამუშაო ადგილების შემცირებასთან დაკავშირებული ერთჯერადი ხარჯების გამო, წმინდა მოგება 12%-ით შემცირდა.

საანგარიშო კვარტალში კომპანიის შემოსავალმა 52,75 მლრდ აშშ დოლარი შეადგინა, წინა წელს შემოსავალი 51,8 მლრდ დოლარი იყო.

Microsoft-ის წმინდა მოგება, ერთ წელიწადში, 18,77 მლრდ დოლარიდან 16,43 მლრდ დოლარამდე შემცირდა. მოგება ერთ აქციაზე, 2,48 დოლარიდან, 2,2 დოლარამდე დაეცა.

FactSet-ის მიერ გამოკითხული ანალიტიკოსები ვარაუდობდნენ, რომ კომპანიის საშუალო შემოსავალი 52,99 მლრდ დოლარი, ხოლო წმინდა შემოსავალი 2,29 აშშ დოლარი იქნება ერთ აქციაზე.

Microsoft-ის სერვისების მთლიანი შემოსავალი ბოლო კვარტალში 22%-ით გაიზარდა და 27,1 მილიარდ დოლარამდე შეადგინა.

Intelligent Cloud-ის („ჭკვიანი ღრუბელი) განყოფილების შემოსავალი, რომელიც მოიცავს Azure-ის ღრუბლოვან სერვისს და ბიზნესს სერვერებისთვის პროგრამული უზრუნველყოფის გამოშვებაზე, 18%-ით გაიზარდა და 21,5 მლრდ დოლარს მიაღწია.

პროდუქტიულობისა და ბიზნეს პროცესების განყოფილებამ, რომელიც აპლიკაციების Office კომპლექტს ავითარებს, შემოსავალი 7%-ით 17 მლრდ დოლარამდე გაზარდა. ამ განყოფილებაში შედის სოციალური ქსელი LinkedIn. მისი შემოსავალი 10%-ით გაიზარდა; Windows ლიცენზიის შემოსავალი 39%-ით დაეცა; შემოსავალი კონტენტიდან და სერვისებიდან Xbox-ისთვის 12%-ით შემცირდა.

კომპანიამ აქციონერებს გასულ კვარტალში აქციების გამოსყიდვისა და დივიდენდების გადახდის გზით 9,7 მლრდ დოლარი დაუბრუნა.

ბოლო 12 თვის განმავლობაში Microsoft-ის კაპიტალიზაცია 16%-ით შემცირდა.