უძრავი ქონების ბაზარზე მოთხოვნაც და ფასიც მაღალ ნიშნულზე ნარჩუნდება. TBC Capital-ის ახალი კვლევის მიხედვით, სექტემბერში, წინა წლის ანალოგიურ პერიოდთან შედარებით, 30%-ით მეტი საცხოვრებელი ფართი გაიყიდა, მაშინ როდესაც ფასი წლიურად 20%-იან ზრდას აჩვენებს.
პიკურად გაზრდილია უძრავი ქონების ქირის ფასი, რისი მთავარი მიზეზი მიგრანტების დიდი ტალღაა. კერძოდ, სექტემბერში ფასი წლიურად 73.5%-იან ზრდას აჩვენებს, წინა თვესთან შედარებით კი ფასი მხოლოდ 0.3%-ით გაიზარდა. TBC Capital-ში აღნიშნავენ რომ სექტემბრის ფასები სრულად ვერ ასახავს მიგრანტების შემოსვლის მეორე ტალღის ეფექტს და მოსალოდნელია რომ ოქტომბრის მონაცემებით ქირის ფასის ზრდა უფრო მასშტაბური იქნება.
ამასთან, მიგრანტების ეფექტი ჯერჯერობით არ ასახულა უძრავი ქონების ყიდვა-გაყიდვაზე და მოსალოდნელია რომ ქირის შემდგომ გადაცემის ეფექტი სწორედ ყიდვა-გაყიდვის ნაწილზე იქნება, რაც შესამჩნევი უკვე წლის ბოლოდან გახდება. შედეგად უძრავი ქონების გაძვირებას სამშენებლო მასალების გაძვირებასთან ერთად ხელს შეუწყობს მაღალი მოთხოვნაც, რომელიც პანდემიის შემდგომ ისედაც მუდმივ ზრდას აჩვენებს.
სანაცვლოდ თუკი მოთხოვნა იჯარიდან ყიდვაზე გადაინაცვლებს მოსალოდნელია რომ 2023-2024 წლებში ქირის ფასი დასტაბილურდება.
სექტემბერში ქირის ფასი თბილისის ყველა უბანში გაიზარდა. ყველაზე დიდი ზრდა - 94% დიდ დიღომში დაფიქსირდა. მას მოსდევს ისანი 88%-იანი ზრდით და გლდანი 86%-იანი ზრდით.
მიგრანტების ეფექტის გამო კვლავ შემცირებულია Airbnb-ზე მოკლევადიანად გასაქირავებელი ბინების რაოდენობა. მიზეზი გრძელვადიან იჯარაზე გაზრდილი მოთხოვნაა. პანდემიამდელ მდგომარეობასთან შედარებით პლატფორმაზე განთავსებული უძრავი ქონების რაოდენობა 24%-ითაა შემცირებული.