იაპონელებმა მსოფლიოში პირველი ორმაგი მოდელის ავტომობილი (dual-mode vehicle-DMV) შექმნეს, რომელსაც გზაზე და რკინიგზაზე მოძრაობა თანაბრად შეუძლია. Reuters-ის ცნობით, DMV-ის საჯარო დებიუტი ტოკუშიმას პრეფექტურის ქალაქ კაიოში მოეწყო.
DMV მიკროავტობუსს ჰგავს და გზაზე სტანდარტული რეზინის საბურავებით მოძრაობს, ხოლო რკინიგზაზე ფოლადის ბორბლებით გადადის, რომლებიც მანქანის ქვედა ნაწილიდან ლიანდაგზე ეშვება და მას, ფაქტობრივად, მატარებლის ვაგონად გადააქცევს. მატარებლის ბორბლები წინა რეზინის საბურავებს ლიანდაგიდან მაღლა სწევს, ხოლო უკანა რეზინის ბორბლები ლიანდაგზე რჩება, რომ DMV-მ რკინიგზაზე მოძრაობა შეძლოს.
ორმაგი მოდელის ავტომობილს კომპანია Asa Coast Railway მართავს. კომპანიის აღმასრულებელი დირექტორი, შიგეკი მიურა აცხადებს, რომ DMV-ები მეტად დაეხმარება კაიოს მსგავს პატარა ქალაქებს, რომლებიც ასაკოვანი და კლებადი მოსახლეობით გამოირჩევიან, ხოლო ადგილობრივი სატრანსპორტო კომპანიები მოგების მისაღებად ბევრს წვალობენ.
„DMV-ები შეძლებენ ადგილობრივ მოსახლეობას ავტობუსისა და მატარებლის სახით თანაბრად მოემსახურონ, განსაკუთრებით სოფლებში, სადაც მოსახლეობა დაბერებულია და მათთვის ეს ძალიან კარგი საზოგადოებრივი ტრანსპორტი იქნება,“ - აცხადებს შიგეკი მიურა.
Asa Coast Railway-ის მონაცემებით, DMV-ს 21-მდე მგზავრის გადაყვანა შეუძლია. სარკინიგზო ლიანდაგზე ის 60 კმ/სთ-ით, ხოლო გზებზე 100 კმ/სთ სიჩქარით მოძრაობს.
დიზელის საწვავზე მომუშავე და სხვადასხვა ფერის მიკროავტობუსების მცირე პარკი სამხრეთ იაპონიის კუნძულ შიკოკუს სანაპიროს ნაწილზე იმოძრავებს და ერთმანეთთან რამდენიმე პატარა ქალაქს დააკავშირებს. გზაზე მგზავრები მიმზიდველი ზღვისპირა პეიზაჟებით დატკბებიან.
შიგეკი მიურა იმედოვნებს, რომ პროექტი სარკინიგზო ტრანსპორტის მოყვარულებს მთელი იაპონიიდან მიიზიდავს.
bpn.ge