მიკრობანკები დეპოზიტების დაზღვევის სისტემაში ჩაერთვებიან და იქ შეტანილი თანხებიც იქნება დაზღვეული, — ამის შესახებ „კომერსანტს“ დეპოზიტების დაზღვევის სააგენტოში განუცხადეს.

ორგანიზაციაში აცხადებენ, რომ დაზღვეული დეპოზიტების ზღვარი მიკრობანკების შემთხვევაშიც იმავე პრინციპით განისაზღვრება, როგორც საბანკო სექტორში. გარდა ამისა, სააგენტოში აღნიშნავენ, რომ ახალი ფინანსური ინსტიტუტის სისტემაში ჩართვა მომხმარებლების მხრიდან მათ მიმართ სანდოობას გაზრდის.

საქართველოს ბანკებში არსებული დეპოზიტები 15 000 ლარამდე მოცულობით დეპოზიტების დაზღვევის სააგენტოს მიერ არის დაზღვეული, ამისთვის ქვეყანაში მოქმედი კომერციული ბანკები სააგენტოს ყოველთვიურად სპეციალურ სადაზღვევო პრემიას უხდიან. ამ შენატანების ზომამ იანვარში 3.337 მილიონი ლარი შეადგინა. მათ შორის, ფიზიკური პირების დეპოზიტები 23,442,042,872 ლარია (ეროვნულ ვალუტაში - 6,652,828,475 ლარი, უცხოურ ვალუტაში - 16,789,214,397 ლარის ეკვივალენტი), ხოლო იურიდიული პირების - 21,538,389,905 ლარი (ეროვნულ ვალუტაში - 13,180,794,938 ლარი, უცხოურ ვალუტაში - 8,357,594,967 ლარის ეკვივალენტი). დეპოზიტების დაზღვევის სისტემით დაზღვეული დეპოზიტების საერთო მოცულობა კი 5,674,317,757 ლარს შეადგენს.

სავალდებულო შენატანი სააგენტოს ფონდში აკუმულირდება და ამ თანხის ძირითადი ნაწილი სახაზინო ობლიგაციებშია განთავსებული, რომელსაც მას წლიურად საშუალოდ 9%-მდე სარგებელი ერიცხება.

2024 წლის პირველი იანვრიდან დაზღვეული დეპოზიტის ანაზღაურებადი თანხის ოდენობა 30 000 ლარამდე გაიზრდება. დეპოზიტების დაზღვევის ზღვართან დაკავშირებით ცვლილება ერთხელ უკვე განხორციელდა, 2020 წლის 1-ლი ივლისიდან დაზღვეული დეპოზიტების ზღვარი 15 000 ლარამდე გაიზარდა. ამასთან, 2022 წლის პირველი იანვრიდან, დეპოზიტების დაზღვევის სისტემა იურიდიულ პირებზეც გავრცელდა. მანამდე კი მხოლოდ ფიზიკური პირების დეპოზიტები იყო დაზღვეული. დეპოზიტების დაზღვევის სისტემა საქართველოში 2018 წლის 1 იანვრიდან მოქმედებს.