მიკრობანკების შესახებ კანონი ძალაში 1-ლი აპრილიდან 1-ელ ივლისამდე პერიოდში შევა. მისი მიღების შემთხვევაში, ბაზარზე ახალი საფინანსო ორგანიზაციები გაჩნდებიან, რომლებიც მიკროსაფინანსოებსა და ჩვეულებრივ ბანკებს შორის შუალედურ პოზიციას დაიკავებენ.
ეროვნული ბანკის ვიცე პრეზიდენტმა პაპუნა ლეჟავამ საფინანსო-საბიუჯეტო კომიტეტის სხდომაზე განაცხადა, რომ ვადების გადაწევასთან დაკავშირებული ცვლილება კანონპროექტში უკვე აისახა. მისი განმარტებით, ახალი ლიცენზია ორიენტირებულია ისეთ ორგანიზაციებზე, რომლებიც ბიზნესებს და სოფლის მეურნეობას აფინანსებენ, რეფორმის შედეგად მიკრობანკებს ექნებათ შესძლებლობა თავიანთ კლიენტებს ხელმისაწვდომობა გაუჩინონ ისეთ პროდუქტებზე როგორიცაა ანგარიშები, შემნახველი დეპოზიტები, საკრედიტო ბარათები და ასე შემდეგ.
თუმცა, კანონპროექტი მისო-ების ნაწილის კრიტიკის ობიექტი მას შემდეგ გახდა, რაც ცნობილი გახდა, რომ მიკრო ბანკები სესხებს მხოლოდ ეროვნულ ვალუტაში გასცემენ. მიკროსაფინანსო ორგანიზაციების ასოციაციის წარმომადგნელის ნინო დევდარიანი „კომერსანტთან“ ამბობს, რომ სავალუტო შეზღუდვა მიკრობანკების ბანკებთან კონკურენციას გაართულებს.
„მომხმარებლები ვინც მიზნობრივ სეგმენტშია და ვისაც უნდა მოემსახურონ მიკრობანკები, თუ არ ექნებათ შესაძლებლობა უფრო იაფიანი კრედიტი აიღონ მიკრობანკებისგან უცხოურ ვალუტაში, წავლენ და ბანკებში აიღებენ. ეს შეზღუდვა საბოლოო ეფექტს საკრედიტო რისკების ნაწილზე ვერ იქონიებს, ერთადერთი ამით მიკრობანკებს ექნებათ შეზღუდული წვდომა იმ მიზნობრივ მომხმარებლებზე რაც შეიძლება რომ მათ ჰყავდეთ. მიკრობანკებს არ შეეძლებათ დოლარის სესხის გაცემა, მაშინ როდესაც 100,000-დან 1 მილიონ ლარამდე დაკრედიტება ზოგადად 60%-ით უცხოურ ვალუტაში ხდება. შესაბამისად, მიგვაჩნია, რომ ეს ჩანაწერი ამ კანონპროექტში არ უნდა იყოს, რადგან ის ბანკებთან კონკურენციას გაართულებს“, — ამბობს ნინო დევდარიანი.
მიკრობანკების კანონის ძალაში შესვლის მოლოდინში არიან სტატუსის მოპოვების მსურველი მისო-ები. ამ დროისთვის მიკრობანკის ლიცენზიის მიღების სურვილი მოქმედი მიკროსაფინასოდან 4-ს აქვს, რომელთა შორის „კრისტალი“, „ემ ბი სი“, „სვის კაპიტალი“ და „ლაზიკაა“.
ცნობისთვის, კანონპროექტის მიხედვით, მიკრობანკის დაფუძნებისთვის საჭირო კაპიტალი 10 მლნ ლარია, მათი სასესხო პორტფელის 70% კი ბიზნეს ან სოფლის მეურნეობის სექტორზე გაცემული სესხები უნდა იყოს. თუმცა, მიუხედავად ასეთი ვალდებულებებისა, სესხის გაცემის ლიმიტი 1 მლნ ლარამდე იზრდება, რაც მათ მცირე და საშუალო ბიზნესის დაკრედიტების შესაძლებლობას მისცემს. მიკრობანკები ანგარიშების გახსნას და მომხმარებლებისთვის თითქმის სრულფასოვანი მომსახურების გაწევასაც შეძლებენ.
მიკრობანკების საკანონმდებლო ინიციატივაზე მუშაობის დაწყება საერთაშორისო სავალუტო ფონდის მიერ რამდენიმე წლის წინ გაცემულ რეკომენდაციებს ეფუძნება, რომლის მიხედვითაც ბანკებსა და მისო-ებს შორის ბაზარზე შუა რგოლის გაჩენა კონკურენციას გაზრდის და საპროცენტო განაკვეთების შემცირებას შეუწყობს ხელს. მიკრობანკების საქართველოს ბაზარზე გაჩენაზე მუშაობა ორი წლის წინ დაიწყო. ის, როგორც შუამავალი ორგანიზაცია მიკროსაფინანსოებსა და ბანკებს შორის კარგად აპრობირებული მოდელია ევროკავშირის ქვეყნებში, ასევე, დიდ ბრიტანეთში და აშშ-ში.