ეროვნული ბანკის ვიცე-პრეზიდენტმა პაპუნა ლეჟავამ პალიტრანიუსის გადაცემაში „ბიზნეს პალიტრა“, განაცხადა, რომ მიკრობანკების ზედამხედველობა ნაკლებად მკაცრი იქნება კომერციული ბანკების ზედამხედველობისგან განსხვავებით. თუმცა ეროვნული ბანკის ვიცე-პრეზიდენტი აღნიშნავს, რომ მიკრობანკების რეგულირება უშუალოდ მიკროსაფინანსო ორგანიზაციებთან შედარებით უფრო მეტად მკაცრი იქნება.

„ზოგადად, მიკრობანკების ზედამხედველობა იქნება უფრო რბილი, ვიდრე საბანკო სექტორისთვის, თუმცა უფრო მკაცრი, ვიდრე მიკროსაფინანსო ორგანიზაციებისთვის. ამ შედარებით რბილ მიდგომას ცხადია, რომ თავისი ვალდებულებები მაინც მოჰყვება. მაგალითად, დაკრედიტების 70% უშუალოდ უნდა მოდიოდეს სამეწარმეო საქმიანობაზე. გარდა ამისა, კიდევ ერთი რეგულირება შეეხება მიკრობანკის ზომას. როდესაც მიკრობანკი მიაღწევს მთლიანი საფინანსო სექტორის 2%-ზე მეტს, ანუ დაახლოებით 1 მილიონ ლარს, მაშინ მას დაემატება ახალი ვალდებულებები და რეგულაციები, რომელთა დაკმაყოფილებაც მოუწევს. კიდევ ერთი შეზღუდვა კი ისიცაა, რომ დაკრედიტების პროცესი იქნება მხოლოდ ლარში.

ამასთან, მთავარი მოთხოვნა, რასაც ეროვნული ბანკი უწესებს კომერციულ ბანკებს, შეეხება დეპოზიტების მოზიდვას, კერძოდ მიკრობანკების დეპოზიტების მოზიდვა შეეძლებათ მხოლოდ დაზღვეული დეპოზიტების ფარგლებში“, - აღნიშნა ეროვნული ბანკის ვიცე-პრეზიდენტმა პაპუნა ლეჟავამ.

ცნობისათვის, ქვეყანაში ახალი საფინანსო ინსტიტუტები - მიკრობანკები გაჩნდება. მოცემული ინსტიტუტის შესახები ახალი კანონპროექტი, ფინანსთა სამინისტროში ეროვნულ ბანკთან ერთად შემუშავდა. ეს მიკრობანკები იქნებიან საბანკო სფეროს შემადგენელი ნაწილი, რომელსაც ზედამხედველობას სრულად გაუწევს საქართველოს ეროვნული ბანკი.

bpn.ge