რადიო კომერსანტის გადაცემაში „პროფესიონალები“ საბანკო რეგულაციები შეაფასეს. გადაცემის სტუმარის, „საზოგადოება და ბანკების“ დამფუძნებლის, გიორგი კეპულაძის თქმით, მიკროსაფინანსო ორგანიზაციების რაოდენობის შემცირება წელსაც მოსალოდნელია.
„რეგულაციების მთავარი მიზანი იყო სესხების გაცემის შეზღუდვა, განსაკუთრებით მიკრო საფინანსო ორგანიზაციების ნაწილში. რეგულაციების პირველივე ტალღას 20-მა ორგანიზაციამ ვერ გაუძლო და ბაზარზე ისინი აღარ არიან. წელსაც ველოდებით შემცირებას. 81 მიკროსაფინანსო ორგანიზაცია, ვფიქრობ ბევრიც კია ჩვენნაირი პატარა ქვეყნის ფინანსური ბაზრისთვის. ისინი ძირითადად იმ ადამიანებს აკრედიტებდნენ,რომლებსაც ბანკი სესხს უკვე აღარ აძლევდა. რაც შეეხება, ეროვნული ბანკის მიერ მონეტარული პოლიტიკის გამკაცრებას, ეს შედეგებს გამოიღებს, თუმცა დრო სჭირდება. თუ ყველაფერი ისე წავიდა,როგორც ეროვნული ბანკი გეგმავს, ზაფხულიდან ინფლაცია შემცირდება,“- ამბობს კეპულაძე. მან გადაცემაში მევახშეების შესახებ ისაუბრა და აღნიშნა,რომ მათი გააქტიურება საბანკო რეგულაციების შედეგს არ წარმოადგენს.
„უნდა გამოვიყვანოთ ჩრდილიდან ეს ადამიანები, გავარკვიოთ რა პორტფელს ფლობენ, რამდენ ადამიანზე აქვთ გასესხებული თანხა ან ვინ არის მათი სეგმენტი. მევახშეების გააქტიურების მიზეზი მხოლოდ რეგულაციები არ ყოფილა, ისინი მანამდეც მუშაობდნენ, რისი მიზეზიც ჩვენი ქვეყნის სიღარიბეა და იმ ადამიანების დიდი რიცხვი,რომლებსაც საკუთარი შემოსავლის დაფიქსირება არ შეუძლიათ,“- ამბობს კეპულაძე.
გადაცემის სტუმარის ეკონომიკური ტრანსფორმაციის ცენტრის თანადამფუძნებლის, ნოდარ სირბილაძის თქმით, მოსახლეობა ლარის კურსს არ ენდობა, რაც ართულებს ლარიზაციის პოლიტიკას.
„ძალიან რთულია ლარიზაციის პოლიტიკის ეფექტური გატარება, ვინაიდან მოსახლეობა თავის ვალუტას არ ენდობა. ამასთანავე, ჩვენ თუ რეფირანსირების განაკვეთს მაღალ ნიშნულზე დავტოვებთ შესაძლოა ბიზნესს მოუწიოს მაღალი პროცენტით სესხის აღება, ეს კი ინფლაციაზე აისახება. ივნისის ბოლოდან როცა დაიწყო ლარის კურსის გაუფასურება, ეროვნულმა ბანკმა თქვა,რომ სანამ ეს გაუფასურება ინფლაციას არ შეეხება, მანამდე ის არ გამოიყენებდა აქტიურ მონეტარულ პოლიტიკას. თუმცა, როცა ინფლაციას მართლა შეეხო უკვე დაგვიანებული აღმოჩნდა, სწორედ ეს არის პრობლემა,ჩვენ ვერ ვაცნობიერებთ იმას,რომ ლარის კურსის გაუფასურება უკვე მოქმედებს ინფლაციაზე,“- ამბობს ნოდარ სირბილაძე. მან აღნიშნა,რომ საბანკო რეგულაციის პირობებში არსებობს ხელოვნური მონოპოლიის ზრდის საფრთხეც.
ჩვენ თუ მაქსიმალურად ვეცდებით,რომ ყოველწლიურად დავტვირთოთ ეს სფერო და შევქმნათ „ბარიერები, გაიზრდება ხელოვნური მონოპოლიის შანსები. ამიტომ აუცილებლად უნდა იყოს კონკურენტული გარემო, ბევრი კომპანია და ორგანიზაცია,რომლებიც შევლენ ერთმანეთთან კონკურენციაში დაა მიიზიდავენ მომხმარებლებს.
რეგულაცია მივიღეთ ისეთი,რომ გარკვეული ჯგუფის ინტერესები უნდა შეგვეწირა იმისთვის,რომ საყოველთაო სიკეთისთვის მიგვეღწია, ჩვენ კი შევწირეთ ისეთი ადამიანები,რომლებსაც არ უფიქსირდებათ შემოსავალი,“- აღნიშნავს ნოდარ სირბილაძე.