„გასულ წელს მთელი ზაფხულის განმავლობაში დაახლოებით 10 000-მდე ვიზიტორი გვყავდა, მათ შორისაა სასკოლო ჯგუფები, სტუდენტები, სხვადასხვა ორგანიზაციები, უცხოელი  ტურისტები და დამსვენებლები“ -  ამის შესახებ „კომერსანტთან“ აბასთუმნის ობსერვატორიის მენეჯერმა და მთავარმა ასტრონომმა ვაჟა ყულიჯანაშვილმა განაცხადა. მისივე თქმით, ობსერვატორია დამთვალიერებელს დღის და ღამის ტურებს სთავაზობს.

„გვაქვს დღის ექსკურსიები, რომელიც დილის 11 საათზე იწყება და საღამოს 6 საათამდე გრძელდება, გვყავს  სპეციალურად შერჩეული გიდები, რომლებიც დღის განმავლობაში მოსულ სტუმრებს ობსერვატორიის ისტორიას აცნობენ, აჩვენებს ერთ-ერთ პირველ ტელესკოპს, აცნობს მისი მუშაობის პრინციპს.  ეს არის 40 სანტიმეტრიანი  რეფრაქტორი, რომელიც ღამის ტურში 00:00 საათიდან 1 საათამდე პერიოდში ხელს გვიწყობს სხვადასხვა პლანეტების და მთვარის დანახვაში, თუმცა აქ მნიშვნელოვანია , რომ ცა მოწმენდილი იყოს. ასევე გვაქვს სპეციალური მუზეუმი, რომელიც დამთვალიერებელს ძალიან საინტერესო  ტურებს სთავაზობს. ზოგადად  ობსერვატორიაში დატვირთვა ძალიან დიდია,“ - აღნიშნა ვაჟა ყულიჯანაშვილმა.

როგორც ყულიჯანაშვილი „კომერსანტთან“ ამბობს, ობსერვატორია დამთვალიერებელს მიმდინარე წელს ბევრ სიახლეს შესთავაზებს. მისი თქმით, ობსერვატორიის მიერ ახალ სივრცეებზე გამოცხადებულ  ტენდერში იტალიურმა კომპანიამ გაიმარჯვა. როგორც ობსერვატორიის მენეჯერი ამბობს იგეგმება ძველი ტელესკოპის AZT 11-ის დემონტაჟი, მის მაგივრად კი დაიდგმება ახალი 1.50 მეტრიანი ტელესკოპი, რომელზეც ავსტრიული კომპანია მუშაობს. აღნიშნული ტელესკოპის მართვა სრულიად ავტომატიზებული იქნება.

„ტენდერში ერთ-ერთმა იტალიურმა კომპანიამ გაიმარჯვა, რომელსაც წინა კვირას ვუმასპინძლეთ, დაათვალიერეს  ჩვენი სივრცეები, ნახეს  სრულიად გარემონტებული AZT-11-ის  შენობა, იქ  გაკეთდება ციფრული მუზეუმი, დაგვემატება კიდევ რამდენიმე ახალი სივრცე, ეზოში გავაკეთებთ მზის საათს, პლანეტარულ სისტემას. წელს ძალიან გადატვირთული წელი გვექნება, ფაქტობრივად ხდება ძველი 1,25 მეტრიანი ტელესკოპის AZT 11-ის დემონტაჟი და მის  ნაცვლად დაიდგმება  სრულიად  თანამედროვე 1,50 მეტრიანი ტელესკოპი, რომელიც იქნება სრულიად ავტომატიზებული, მისი მართვა  შესაძლებელია დისტანციურად და მის სამართავად ობსერვატორიაში ყოფნა  საჭირო არაა. ასევე დამონტაჟდება ახალი გუმბათი. ეს  პროექტი  წლის ბოლომდე უნდა  დასრულდეს. ასევე  გეგმაში გვაქვს ბევრი სხვა პროექტიც, მაგალითად  „გლაზენაპის კოშკი“  გადმოვიტანეთ მისი  ძველი ადგილიდან.   როგორც  სამუზეუმო ექსპონატი  და იქაც  ვაპირებთ  ტურისტული  სივრცის  მოწყობას, იმედი  გვაქვს, რომ  ამ  ყველაფერს შევასრულებთ“, - აღნიშნა ვაჟა ყულიჯანაშვილმა.

ყულიჯანაშვილის თქმით, ახალი ტელესკოპის პროექტი 3 მილიონ ევრომდე  ჯდება, რომელიც საქართველოს  მთავრობის  და მსოფლიო  ბანკის ჩართულობით  ხორციელდება. ყულიჯანაშვილი ასევე  აღნიშნავს, რომ  ობსერვატორიის  ტერიტორიაზე იგეგმება სასტუმროების რემონტი, ასევე  განთავსდება სასადილო და კაფე-ბარები. 

ყულიჯანაშვილმა კომერსანტთან საუბრისას აღნიშნა, რომ აბასთუმნის  ობსერვატორია ილიაუნის  დაქვემდებარებაში  აღარაა.

ხოლო  რაც  შეეხება  უცხოელ  ვიზიტორებს ყულიჯანაშვილი ამბობს, რომ ობსერვატორიას  ხშირად სტუმრობენ რუსები,  უკრაინელები, გერმანელები და იტალიელები, თუმცა სხვადასხვა ქვეყნიდანაც ბევრი  დამსვენებელო ჩამოდის.

თაკო კვაჭანტირაძე