„ჩვენ ძირითადად ქათმის ხორცს ვაწარმოებთ, ჩვენთან მიმდინარე წელს ფასზე წლიური ნამატი, დაახლოებით  8-10% -ია, რაც ენერგომატარებლებზე ფასის ზრდით და ქათმების საკვებზე ფასის ზრდით არის გამოწვეული“, - ამის შესახებ „კომერსანტს“ ქათმის ხორცპროდუქტების მწარმოებელი კომპანია „ჩირინას” დამფუძნებელმა რევაზ ვაშაკიძემ განუცხადა. მისი თქმით „ჩირინას“ ქათმის საკვები ძირითადად უკრაინიდან შემოჰქონდა, ეს ბაზარი კი დღეს შეჩერებულია.

„ჩვენი პროდუქციაზე ფასის ზრდა გამოიწვია იმან, რომ ენერგომატარებლებზე ფასი გაიზარდა. მაგალითად გაზი დაახლოებით 30% - ით გაძვირდა, ჩვენ ფასი ეროვნულ ვალუტაში გვაქვს დაფიქსირებული, ხორბლის ფასი გაიზარდა, სიმინდის ფასი გაიზარდა.  ჩვენთან ფასში 60-70%  არის საკვების ფასი, რისი ტენდენციაც დღეს მზარდია  და ალბათ  კიდევ  გაიზრდება.

გამომდინარე იქიდან, რომ უკრაინა საკვების ერთ-ერთი ყველაზე დიდი მიმწოდებელია  და ეს ბაზარი საქართველოსთვის  ფაქტობრივად  გათიშულია,  რუსეთიდან შემოტანა კი გართულებულია, რადგან რუსეთმა კვოტირება  გააკეთა, საექსპორტო გადასახადი გაზარდა და ა.შ. თვითღირებულება გაგვეზარდა.  საერთაშორისო ბაზარზე  ძალიან მძიმე მდგომარეობაა,  მიუხედავად იმისა, რომ მოთხოვნა საკმაოდ მაღალია მომავალში წარმოებას ვერ გავზრდით. ბაზარზე დიდი გაურკვევლობაა. გაურკვევლობაა ასევე საფინანსო პოლიტიკის კუთხითაც, ჩემთვის გაუგებარია რა კურსი იქნება შემდეგ წელს, ჩვენ რასაც ვიძენთ, იქნება ეს საკვები, წამლები, ვაქცინა და ა.შ. დოლარზე ვიძენთ“,  -  აღნიშნა რევაზ ვაშაკიძემ.

რაც  შეეხება „ჩირინას“ გაყიდვებს ვაშაკიძე ამბობს, რომ კომპანიის გაყიდვების დიდი წილი, 60-%-ი ადგილობრივ ბაზარზე მოდის, 40%-ი კი აზერბაიჯანსა და  სომხეთში ექსპორტზე გადის. მისი თქმით. გაყიდვები სტაბილურია „ვერ ვიტყვი, რომ ხალხის შემოსავლები და გაყიდვები გაიზარდა, სტაბილურად  მივდივართ“, - აღნიშნა რევაზ ვაშაკიძემ.

ქათმის ხორცპროდუქტების მწარმოებელი კომპანია „ჩირინა“  დეკემბრიდან სოსისის მაღაზიებს გახსნის, როგორც  რევაზ ვაშაკიძემ აღნიშნა კომპანია ამ ეტაპზე  ლოკაციების შერჩევის პროცესშია, თავდაპირველად მაღაზიები დედაქალაქში გაიხსნება და საწყის ეტაპზე მათი რაოდენობა 6 იქნება.

საქსტატმა დღეს წლიური ინფლაციის შესახებ ანგარიში გამოაქვეყნა, რომლის თანახმადაც, აგვისტოში წინა წელთან შედარებით ფასების საერთო დონე 10.9%-ით გაიზარდა. კონკრეტული ჯგუფების მიხედვით, ფასები ყველაზე მკვეთრად არის მომატებული სურსათის ჯგუფზე, სადაც მატება 15.8%-ს აღწევს. ჯგუფში სურსათი და უალკოჰოლო სასმელებიი ყველა ძირითადი სასურსათო პროდუქტის ღირებულება გაზრდილია, ჯგუფში ფასები 1,8 პროცენტით გაიზარდა რაც  წლიურ ინფლაციაზე 5,14 პროცენტული პუნქტით აისახა. ფასები მომატებულია შემდეგ ქვეჯგუფებზე: პური და პურპროდუქტები (32.4 პროცენტი), რძე, ყველი და კვერცხი (20.8 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (20.3 პროცენტი), ზეთი და ცხიმი (19.8 პროცენტი), ყავა, ჩაი და კაკაო (18.7 პროცენტი), შაქარი, ჯემი და სხვა ტკბილეული (18.6 პროცენტი), თევზეული (13.6 პროცენტი), ხორცი და ხორცის პროდუქტები (11.1 პროცენტი), ხილი და ყურძენი (2.5 პროცენტი). ამასთან, ფასები შემცირდა ბოსტნეულსა და ბაღჩეულზე (-9.6 პროცენტი);

თაკო კვაჭანტირაძე