ბახტრიონის ქუჩაზე ახალგაზრდა ფერმერის ბრენდის ქვეშ ნატურალური ხორცის, რძის ნაწარმის და ხილ-ბოსტნეულის პირველი მაღაზია იხსნება.
„კომერსანტი“ დეტალებისთვის ახალგაზრდა ფერმერს, ირაკლი ვაშაყმაძეს დაუკავშირდა, როგორც მან აღნიშნა 5-6 წელია რაც მცირე მეურნეობით არის დაკავებული და საბოლოოდ მაღაზიის გახსნის გადაწყვეტილებამდე მივიდა.
„როგორც კახეთში, ასევე კრწანისში - რუსთავის გზაზე ჩემი მეურნეობა მაქვს, ვაწარმოებთ ნატურალურ პროდუქტებს, ჩავერთე „აწარმოე საქართველოს” პროექტში და გავიმარჯვე, “ახალგაზრდა ფერმერის” ბრენდის ქვეშ ვხსნი კეთილმოწყობილ მაღაზიას. მაღაზიაში მექნება ხილ-ბოსტნეული, ახალი ხორცი, რძის პროდუქტები, ყველაფერი ნატურალური, მაღაზიის გახსნას სავარაუდოდ ივნისის შუა რიცხვებიდან ვგეგმავთ. 5-6 წელიწადზე მეტია რაც მეურნეობით ვარ დაკავებული, აგროზარალების მიმართულებით ერთ-ერთ სადაზღვევო კომპანიაში ვმუშაობდი, საბოლოოდ მივედი იმ გადაწყვეტილებამდე, რომ ეს მაღაზია გამეკეთებინა.“ - აღნიშნა ირაკლი ვაშაყმაძემ.
ახალგაზრდა ფერმერი ამ ეტაპზე კადრების შერჩევის პროცესს აწარმოებს და სავარაუდოდ უახლოეს მომავალში რამდენიმე ადამიანს დაასაქმებს, იქნება ეს ყასაბი, მოლარე - კონსულტანტი თუ სხვა. გარდა ამისა, ირაკლი ვაშაყმაძე ფიქრობს, რომ მიუხედავად დიდი კონკურენციისა ბაზარზე თავს მარტივად დაიმკვიდრებს, რადგან მომხმარებელს მხოლოდ ჯანსაღ და ნატურალურ პროდუქტს შესთავაზებს, ხოლო ნატურალური პროდუქციის მიმართ მომხმარებლის ინტერესი საკმაოდ მაღალია.
“მე ჩემ მეურნეობაზე ვარ პასუხისმგებელი, ვიცი, რომ აბსოლუტურად ნატურალური პროდუქტი მაქვს, რადგან ბუნებრივ ნაკელსაც არ ვიყენებ სასუქად. რა თქმა უნდა იქნება ისეთი, პროდუქტიც, რომელიც ჩემი წარმოებული არ არის, მაგალითად ბანანი და ანანასი, მოგეხსენებათ მათი მოყვანის საშუალებას საქართველოს კლიმატი არ იძლევა. მათ გარეშე კი მომხმარებელს დავკარგავ, ამიტომ აქცენტი ნაწილობრივ ჭრელ პროდუქციაზეც მაქვს. ზოგადად დღეს სიტუაცია ძალიან დამძიმდა და ნატურალური პროდუქტები გადარჩენის ერთადერთი გზაა.
რაც შეეხება მომხმარებლის დაინტერესებას საკმაოდ დიდია, მესამე წელია რაც “ახალგაზრდა ფერმერის” სახელით სოციალურ ქსელში გვერდი მაქვს, რომელსაც 5000-ზე მეტი გამომწერი ჰყავს, ამ პერიოდის მანძილზე ეს ადამიანები სულ აქტიურობდნენ და მაღაზიის გახსნას გვთხოვდნენ. ბაზრის სამ წლიანმა კვლევამ მიბიძგა, რომ ეს საქმე დამეწყო. ადგილიც ისეთი შევარჩიეთ, რომ რეალურად არც ამ ქუჩაზე და არც პარალელურ ქუჩაზე არ შეიძლება, რომ ვინმე ჩემ კონკურენტად აღვიქვა, რა თქმა უნდა, ყველას ვისაც ხილ-ბოსტანი აქვს ჩვენ კონკურენტად მოიაზრება, მაგრამ ჩვენი მაღაზიის ინტერიერიც განსაკუთრებულია, მინი აგრო ჰაბის მსგავსს ვაკეთებთ, რა თქმა უნდა ამხელა ქსელის კონკურენტად თავს არ ვთვლით, მაგრამ ძალიან ბევრი გამორჩეული პროდუქტი გვექნება” - აღნიშნა ირაკლი ვაშაყმაძემ.
თაკო კვაჭანტირაძე