რუსეთის მიერ უკრაინაში განხორციელებული სამხედრო აგრესია ევროპაში ქართული ღვინის ექსპორტზე უარყოფითად აისახა - ამის შესახებ ,,ბიზნესპრესნიუსთან“ „ხუციშვილების ღვინის მარნის“ თანადამფუძნებელი, გელა ხუციშვილი საუბრობს.
მისი თქმით, შემცირებული გაყიდვების ტენდენცია თუ კვლავ გაგრძელდა, მომავალი რთველისთვის წარმოებას შეამცირებენ.
„2015 წელს, მე და ჩემი ძმა თბილისიდან დავბრუნდით ჩვენს ისტორიულ სოფელში, კისისხევში და აღვადგინეთ 2-საუკუნოვანი მარანი. პირველი მოსავალი 2016 წელს მივიღეთ. ჩვენი მარანი წლიურად 15 000 ბოთლ ღვინოს აწარმოებს. 2020 წლიდან ღვინო გაგვაქვს ევროკავშირის წევრ ქვეყნებში და აშშ-ში. საკმაოდ წარმატებული და მზარდი გაყიდვები გვქონდა. რუსეთსა და უკრაინაში აქამდეც პრაქტიკულად არ გვქონია ექსპორტი. მიუხედავად ამისა, ჩვენს გაყიდვებზე ომი აისახა.
არსებობს ასეთი, ჩვენი პარტნიორი კომპანია 8 მილენიუმი, რომლის საშუალებითაც ონლაინ პლატფორმაზეა განთავსებული ჩვენი პროდუქცია და ევროპის 28 ქვეყნაში შეუძლია მომხმარებელს შეძენა. შეკვეთიდან ძალიან მალე, გერმანიის ფოსტა აწვდით ღვინოს. მიუხედავად იმისა, რომ ევროკავშირის წევრ ქვეყნებში ომი არ არის, გაყიდვები იქ ძალიან შემცირდა. სავარაუდოდ, ეს განპირობებულია შოკური მდგომარეობით, რაშიც მომხმარებელია. ასევე, მოხდა პირველადი დანიშნულების პროდუქტის გაძვირება ყველგან და როგორც ჩანს, ადამიანებს ღვინისთვის თანხის გამეტება უფრო მეტად უჭირთ.
შოკურ მდგომარეობაშია არა მხოლოდ მომხმარებელი, ბიზნესიც. მდგომარეობას ვაკვირდებით და ვაანალიზებთ. იმის მიხედვით დავგეგმავთ რთველი 2022-ს. გაყიდვები თუ ამ ნიშნულზე დარჩა, ცხადია, წარმოებას შევამცირებთ“, - განაცხადა გელა ცუხიშვილმა.
მისივე თქმით, საოჯახო ბიზნესი ღვინოსთან ერთად, გასტრო ტურიზმსაც მოიცავს.
„გარდა მარნისა, ჩვენ გვაქვს მცირე საოჯახო სასტუმრო, რომელიც მთლიანად გასტრო ტურიზმის კონცეფციაზეა აგებული. ერთდროულად 14 ადამიანის დაბინავება შეგვიძლია. საკვების დამზადების მასტერკლასებს კი 70-80 ადამიანზე ვმართავთ. სტუმრები მსოფლიოს ყველა ქვეყნიდან გვყავს. ძირითადად, ევროპა და ისრაელი“, - განუცხადა ,,ბიზნესპრესნიუსს“ ხუციშვილების ღვინის მარნის დამფუძნებელმა.
ღვინო
