საქართველოს ტყეების განაშენიანების საქმეში მიხეილ მურვანიშვილს უდიდესი წვლილი მიუძღვის. მას საქართველოს ტყეების „მესაძირკვლესაც“ უწოდებენ. სწორედ მან დაიწყო ტყეების მასშტაბური გაშენება საქართველოს სხვადასხვა მხარეში.
მიხეილ მურვანიშვილი დაბა სურამში 1875 წელს დაიბადა, დაამთავრა ახალციხის სატყეო სასწავლებელი და მას შემდეგ მრავალი წლის განმავლობაში საგანმანათლებლო საქმიანობას მისდევდა.
1883 წელს მარტყოფის სატყეოს უფროსის თანაშემწედ დაინიშნა. მარტყოფსა და საგარეჯოში უფასო სამკითხველოები გახსნა და ხალხში წერა-კითხვის გასავრცელებლად ძალ-ღონეს არ იშურებდა.
1903 წელს, მიხეილ მურვანიშვილი კახეთიდან აბასთუმანში, სატყეოს უფროსის თანაშემწედ გადაიყვანეს, ხოლო 1907 წელს კი იგივე თანამდებობაზე ბაკურიანში დაიწყო მუშაობა. ბაკურიანში, სოფელ თორში დასახლდა და ბორჯომის ტყეებზე ზრუნვას შეუდგა.თორში სასმელი წყლის მილსადენი გაყვანა დაიწყო. 14 კმ სიგრძის საურმე გზა გააყვანინა ბორჯომამდე, მადლიერმა მოსახლეობამ კი ამ გზას „მურვანიშვილის გზა“ უწოდა.
1910 წლიდან მიხეილ მურვანიშვილი წაღვერის სატყეოს უფროსად ინიშნება, სადაც 8 წელი იმუშავა, ააშენა სკოლა, თეატრის შენობა, სამკითხველო, გაიყვანა წყლის 3 კმ-იანი მილსადენი, მოაწყო სპორტული მოედანი, აღმოაჩინა მჟავე წყლები და ისინი შესაბამისად მოაწყო, ააშენა და მოაწყო წაღვერის ტყე-პარკი. სწორედ მან დაგეგმა, გააშენა ტყე და კურორტის სახე მისცა კეჩხობს. მიხეილ მურვანიშვილმა, წაღვერში, ნახანძრალ ადგილებში – გვირგვინას უბანზე, საყდრის ღელესა და მიტარბის ფერდობზე 455 ჰექტარზე ფიჭვის ტყე გააშენა.
1924 წელს, მიხეილ მურვანიშვილმა ბორჯომში საქართველოში პირველი თესლის საშრობი ქარხანა დააარსა, გამოჰყავდა წიწვოვანი ხეების თესლები, რომელიც გაჰქონდათ სხვადასხვა ქვეყნებში.
მომდევნო წლებში, მიხეილ მურვანიშვილმა სანერგეები მოაწყო ბორჯომში, აბასთუმანში, წაღვერში, წყალტუბოსა და ბახმაროში. დააარსა ბორჯომის სატყეო მუზეუმი, რომელიც მოგვიანებით მხარეთმცოდნეობის მუზეუმად გადაკეთდა.
მისი მოღვაწეობის პერიოდში საქართველოს ტყეების ფართობები გაიზარდა, ნახანძრალი ადგილებზე ტყის კორომები ირგვებოდა.
1934 წელს მიხეილ მურვანიშვილი სურამის სატყეო მეურნეობის დირექტორად დაინიშნა. მშობლიურ სურამში მოაწყო სამკითხველო და სანერგე. სურამის გარშემო კი ახალი ტყეები გააშენა. ბაიანთხევის და კვირაცხოვლის სერებზე, ნუნის ზვარეში, 131 ჰექტარზე ფიჭვის ტყეები გააშენა.
მიხეილ მურვანიშვილი პუბლიცისტურ საქმიანობასაც ეწეოდა და ხშირად აქვეყნებდა კრიტიკულ წერილებს ტყის დაცვის საკითხებზე. ერთ-ერთი ასეთია „ხანძარი ტყეში’, რომელშიც ის ხალხს ასწავლის, როგორ უნდა მოიქცნენ, რომ ტყეში ხანძარი არ გაჩნდეს. ამ წერილის შინაარსი დღესაც აქტუალურია.
მიხეილ მურვანიშვილი 1959 წელს გარდაიცვალა, ის დაკრძალულია სურამში, თავისივე გაშენებულ ბაიანთხევის ტყეში.
გამოჩენილ მეტყევეს ცნობილი შთამომავალიც ჰყავდა, ლეგენდარული ქართველი ფეხბურთელი, დავით ყიფიანი, მიხელ მურვანიშვილის შვილთაშვილი იყო.
მიხეილ მურვანიშვილის საფლავი სურამში