მე გადავწყვეტ ვის მივმართო, მივმართავ ქართველ ხალხს, თქვენ ისეთი სასამართლო ხართ, როგორც მე ვარ ასტრონავტი, ვაპირებ, შევხედო თვალებში ქართველ ხალხს, – ასე მიმართა საქართველოს ყოფილმა პრეზიდენტმა, მიხეილ სააკაშვილმა საქალაქო სასამართლოს მოსამართლეს.

მიხეილ სააკაშვილმა ეს განცხადება მას შემდეგ გააკეთა, რაც მოსამართლემ მიმართა, რომ პატივი ეცა სასამართლოსთვის და საუბრის დროს მიემართა მოსამართლისთვის და არა დარბაზში მყოფი პირებისთვის.

„თქვენ ჩემთვის არავინ არ ხართ საერთოდ, მივმართავ ქართველ ხალხს, რომლის წინაშე წარვდექი აქ და ვერავინ გამაწყვეტინებს, თუ გამაწყვეტინებთ, შემდეგ ქართველი ხალხი გაგცემთ პასუხს. მე სად ვბრძანდები ძალიან კარგად ვიცი, ეს სხდომის დარბაზი არის ჩემი აშენებული, ეს დროშა, რომელიც თქვენ უკან არის ჩემი გაკეთებულია, ეგ სკამი, რომელზეც ზიხართ, ჩემი დადგმულია, ეს აუდიტორიები ჩემი გაკეთებულია, ეს გალია ჩემი აშენებულია. მე სად ვარ, თქვენი ახსნა-განმარტება არ მჭირდება. ყველაფერი, რაც გაკეთებულია ამ ქვეყანაში, ყველაფერი, რაც არ გააფუჭეს აქამდე, არის ჩემი გაკეთებული და ახლა თქვენი ახსნა-განმარტება ნამდვილად არ მჭირდება და ნუცას სკოლა. თქვენგან განსხვავებით ოთხი უმაღლესი სასწავლებელი იურიდიული მაქვს დამთავრებული, არანაირ პატივს არ ვცემ ივანიშვილის სასამართლოს. ნულოვანი პატივისცემა მაქვს თქვენი სასამართლოს მიმართ, ნულოვანი პატივისცემა მაქვს თქვენი ე.წ. სამართლის მიმართ, მიუხედავად იმისა, რომ პატივს ვცემ ჩემს ხალხს და ქართველი ხალხის პატივისცემის გამო ჩამოვედი ამ ქვეყანაში და მივმართავ ჩემს ხალხს. ქალბატონო, მე თქვენი თვალები საერთოდ არ მიზიდავს უკაცრავად, მე მივმართავ ქართველ ხალხს“, – განაცხადა მიხეილ სააკაშვილმა.

მიხეილ სააკაშვილმა დარბაზში მსხდომებს მიმართა, თუ გამოიცნობენ, რისთვის ზის ციხეში.

„ნიკა გვარამია მრავალმხრივი ნიჭით გამოირჩევა, მათ შორის არის „ყველაზე ჭკვიანის“ წამყვანი. თქვენ იცით, რომ გუშინ და გუშინწინ ბრიუსელში იმართებოდა ნატო-ს სამიტი, ნატო-სა და რუსეთის შეხვედრა, ჟენევაში და ბრიუსელში, სადაც რუსეთი მოითხოვდა ამოიეღოთ ის ფორმულირება, რომელიც მე, პოლონეთის პრეზიდენტმა კაჩინსკიმ, ამერიკელების დახმარებით 2009 წელს გავიტანეთ ბუქარესტში, რომ საქართველო და უკრაინა გახდებიან ნატო-ს წევრი. მინდა, განსაკუთრებით ჭკვიანებს აუდიტორიაში დავუსვა ამოცანა, როგორ გგონიათ, რატომ ვიმყოფები მე დღეს ციხეში – პირველი – კოსტიუმების ყიდვის გამო, მეორე – საქართველოში არალეგალურად შემოსვლის გამო, მესამე ვარიანტი ეს არის იუშენკოს აბანოში მომსახურების გამო და შამპუნის ფასის გამო, მეოთხე ვარიანტი არის ბუქარესტის ფორმულირების გამო და იმის გამო, რომ საქართველო არ ჩავაბარეთ რუსეთს 2008 წელს. აბა, ამ ოთხიდან ერთი გამოიცანით, რის გამო იმყოფება დღეს სააკაშვილი, ბუქარესტის ფორმულირების ავტორი პატიმრობის ქვეშ, ყველაფერს იგლეჯს პუტინი, რომ ეს ფორმულირება გააუქმოს, ეტყობა რაღაცისთვის მიმიღწევია ჩემს ცხოვრებაში, არა? მახსოვს უძილო სამი ღამე ბუქარესტში, როდესაც ერთად ვიბრძოდი პრეზიდენტ ბუშთან, პრეზიდენტ კაჩინსკისთან ერთად გერმანელებისა და ფრანგების წინააღმდეგ“, – განაცხადა მიხეილ სააკაშვილმა.

1tv.ge