M&M’s-ის ტკბილეულის მწარმოებელი კომპანია დროებით წყვეტს სარეკლამო მიზნით „მოლაპარაკე კანფეტების“ გამოყენებას. ამის შესახებ საუბარია კომპანიის განცხადებაში, რომელიც ტვიტერზე 23 იანვარს გამოქვეყნდა.
კომპანიის განმარტებით „მოლაპარაკე კანფეტის“ გამოყენებაზე დროებით უარი თქმა მას შემდეგ მოუწიათ, რაც კანფეტების გარეგნობა შეცვალეს. კონკრეტულად, 2022 წლის იანვარში მწარმოებელმა მწვანე პერსონაჟის მაღალქუსლიანი ჩექმები, სპორტული ფეხსაცმლებით შეცვალა, რათა მისი სახე უფრო ინკლუზიური ყოფილიყო. ამასთან „ქალების გაძლიერების ხელშეწყობისთვის“ წარმოების ხაზს დაემატა „მდედრობითი სქესის“ იასამნისფერი კანფეტიც. როგორც M&M’s-ის ბრენდის მფლობელ კომპანია Mars-ში აღნიშნავდნენ, ამ ცვლილებით, კომპანია მომხმარებელს საყვარელი პერსონაჟების განახლებულ, თანამედროვე იმიჯის სთავაზობდა, რათა ხაზი გაესვა თვითგამოხატვის მნიშვნელობისთვის და შეექმნა ისეთი სამყარო, სადაც არავინ იგრძნობდა თავს ზედმეტად.
„მოლაპარაკე კანფეტების“ განახლებულმა ატრიბუტებმა სოციალურ ქსელებში კრიტიკის ტალღა გამოიწვია. კერძოდ, Cnange.org-ზე გამოქვეყნებულმა პეტიციამ, რომელიც მწვანე M&M's-ისთვის სექსუალურობის შენარჩუნებას ითხოვს, 20 ათასზე მეტი ხელმოწერა შეაგროვა.
„ჩვენ ნამდვილად არ გვეგონა, რომ ეს ინტერნეტში განხეთქილებას გამოიწვევდა. მაგრამა ახლა გვესმის, რომ კანფეტების ფეხსაცმელმაც კი შეიძლება საზოგადოება დაყოს, ეს კი M&M’s-ს არ სჭირდება, რადგან ჩვენ ადამიანების გაერთიანებას ვცდილობთ.“- აცხადებენ კომპანიაში.
ბრენდის წარმომადგენელი მსახიობი და კომიკოსი მაია რუდოლფი იქნება, სწორედ ის ითამაშებს მთავარ როლს რეკლამაში, რომელიც თებერვალში გამოვა.
ამავდროულად, მიუხედავად იმისა, რომ M&M's-მა უარი თქვა რეკლამაში „მოლაპარაკე კანფეტების“ გამოყენებაზე, როგორც The Wall Street Journal-ი წერს სოციალურ ქსელებში ბრენდს ეს გმირები წარმოადგენენ.